अत्तवग्ग   Attavagga

बोधिराजकुमारवत्थु   Bodhirājakumāravatthu

अत्तानञ्चे पियं जञ्ञा,   Attānañce piyaṁ jaññā, रक्खेय्य नं सुरक्खितं;   rakkheyya naṁ surakkhitaṁ; तिण्णं अञ्ञतरं यामं,   Tiṇṇaṁ aññataraṁ yāmaṁ, पटिजग्गेय्य पण्डितो।   paṭijaggeyya paṇḍito.

उपनन्दसक्यपुत्तत्थेरवत्थु   Upanandasakyaputtattheravatthu

अत्तानमेव पठमं,   Attānameva paṭhamaṁ, पतिरूपे निवेसये;   patirūpe nivesaye; अथञ्ञमनुसासेय्य,   Athaññamanusāseyya, न किलिस्सेय्य पण्डितो।   na kilisseyya paṇḍito.

पधानिकतिस्सत्थेरवत्थु   Padhānikatissattheravatthu

अत्तानञ्चे तथा कयिरा,   Attānañce tathā kayirā, यथाञ्ञमनुसासति;   yathāññamanusāsati; सुदन्तो वत दमेथ,   Sudanto vata dametha, अत्ता हि किर दुद्दमो।   attā hi kira duddamo.

कुमारकस्सपमातुत्थेरिवत्थु   Kumārakassapamātuttherivatthu

अत्ता हि अत्तनो नाथो,   Attā hi attano nātho, को हि नाथो परो सिया;   ko hi nātho paro siyā; अत्तना हि सुदन्तेन,   Attanā hi sudantena, नाथं लभति दुल्लभं।   nāthaṁ labhati dullabhaṁ.

महाकालौपासकवत्थु   Mahākālaupāsakavatthu

अत्तना हि कतं पापं,   Attanā hi kataṁ pāpaṁ,
Attanā hi → attanā va (bj, sya-all, pts1ed, pts2ed) अत्तजं अत्तसम्भवं;   Attajaṁ attasambhavaṁ; अभिमत्थति दुम्मेधं,   Abhimatthati dummedhaṁ,
Abhimatthati → abhimanthati (bj) वजिरंवस्ममयं मणिं।   Vajiraṁvasmamayaṁ maṇiṁ.
Vajiraṁvasmamayaṁ → vajiraṁvamhayaṁ (sya-all); vajiraṁva'mhamayaṁ (pts1ed, pts2ed, mr)

देवदत्तवत्थु   Devadattavatthu

यस्स अच्चन्तदुस्सिल्यं,   Yassa accantadussilyaṁ, मालुवा सालमिवोत्थतं;   māluvā sālamivotthataṁ; करोति सो तथत्तानं,   Karoti so tathattānaṁ, यथा नं इच्छती दिसो।   yathā naṁ icchatī diso.

सङ्घभेदपरिसक्कनवत्थु   Saṅghabhedaparisakkanavatthu

सुकरानि असाधूनि,   Sukarāni asādhūni, अत्तनो अहितानि च;   attano ahitāni ca; यं वे हितञ्च साधुञ्च,   Yaṁ ve hitañca sādhuñca, तं वे परमदुक्करं।   taṁ ve paramadukkaraṁ.

कालत्थेरवत्थु   Kālattheravatthu

यो सासनं अरहतं,   Yo sāsanaṁ arahataṁ, अरियानं धम्मजीविनं;   ariyānaṁ dhammajīvinaṁ; पटिक्कोसति दुम्मेधो,   Paṭikkosati dummedho, दिट्ठिं निस्साय पापिकं;   diṭṭhiṁ nissāya pāpikaṁ; फलानि कट्ठकस्सेव,   Phalāni kaṭṭhakasseva, अत्तघाताय फल्लति।   attaghātāya phallati.
attaghātāya → attaghaññāya (bj, sya-all, pts1ed, pts2ed)

चूळकालौपासकवत्थु   Cūḷakālaupāsakavatthu

अत्तना हि कतं पापं,   Attanā hi kataṁ pāpaṁ,
Attanā hi → attanā va (bj, sya-all, pts1ed, pts2ed) अत्तना सङ्किलिस्सति;   attanā saṅkilissati; अत्तना अकतं पापं,   Attanā akataṁ pāpaṁ, अत्तनाव विसुज्झति;   attanāva visujjhati; सुद्धी असुद्धि पच्चत्तं,   Suddhī asuddhi paccattaṁ, नाञ्ञो अञ्ञं विसोधये।   nāñño aññaṁ visodhaye.
aññaṁ → nāññamañño (bj)

अत्तदत्थत्थेरवत्थु   Attadatthattheravatthu

अत्तदत्थं परत्थेन,   Attadatthaṁ paratthena, बहुनापि न हापये;   bahunāpi na hāpaye; अत्तदत्थमभिञ्ञाय,   Attadatthamabhiññāya, सदत्थपसुतो सिया।   sadatthapasuto siyā.

अत्तवग्गो द्वादसमो।   Attavaggo dvādasamo.