कोधवग्ग   Kodhavagga

रोहिनीखत्तियकञ्ञावत्थु   Rohinīkhattiyakaññāvatthu

कोधं जहे विप्पजहेय्य मानं,   Kodhaṁ jahe vippajaheyya mānaṁ, संयोजनं सब्बमतिक्कमेय्य;   Saṁyojanaṁ sabbamatikkameyya; तं नामरूपस्मिमसज्जमानं,   Taṁ nāmarūpasmimasajjamānaṁ, अकिञ्चनं नानुपतन्ति दुक्खा।   Akiñcanaṁ nānupatanti dukkhā.

अञ्ञतरभिक्खुवत्थु   Aññatarabhikkhuvatthu

यो वे उप्पतितं कोधं,   Yo ve uppatitaṁ kodhaṁ, रथं भन्तंव वारये;   rathaṁ bhantaṁva vāraye;
vāraye → dhāraye (bj, sya-all, pts1ed, pts2ed) तमहं सारथिं ब्रूमि,   Tamahaṁ sārathiṁ brūmi, रस्मिग्गाहो इतरो जनो।   rasmiggāho itaro jano.

उत्तराउपासिकवत्थु   Uttarāupāsikavatthu

अक्कोधेन जिने कोधं,   Akkodhena jine kodhaṁ, असाधुं साधुना जिने;   asādhuṁ sādhunā jine; जिने कदरियं दानेन,   Jine kadariyaṁ dānena, सच्चेनालिकवादिनं।   saccenālikavādinaṁ.

महामोग्गल्लानपञ्हवत्थु   Mahāmoggallānapañhavatthu

सच्चं भणे न कुज्झेय्य,   Saccaṁ bhaṇe na kujjheyya, दज्जा अप्पम्पि याचितो;   dajjā appampi yācito;
dajjā appampi → dajjā'ppasmimpi (bj); dajjā appasmi (sya-all, pts2ed, mr); dajjā appasmiṁ (pts1ed) एतेहि तीहि ठानेहि,   Etehi tīhi ṭhānehi, गच्छे देवान सन्तिके।   gacche devāna santike.

बुद्धपितुब्राह्मणवत्थु   Buddhapitubrāhmaṇavatthu

अहिंसका ये मुनयो,   Ahiṁsakā ye munayo,
Ahiṁsakā ye munayo → ahiṁsakāyā munayo (mr) निच्चं कायेन संवुता;   niccaṁ kāyena saṁvutā; ते यन्ति अच्चुतं ठानं,   Te yanti accutaṁ ṭhānaṁ, यत्थ गन्त्वा न सोचरे।   yattha gantvā na socare.

पुण्णदासीवत्थु   Puṇṇadāsīvatthu

सदा जागरमानानं,   Sadā jāgaramānānaṁ, अहोरत्तानुसिक्खिनं;   ahorattānusikkhinaṁ; निब्बानं अधिमुत्तानं,   Nibbānaṁ adhimuttānaṁ, अत्थं गच्छन्ति आसवा।   atthaṁ gacchanti āsavā.

अतुलौपासकवत्थु   Atulaupāsakavatthu

पोराणमेतं अतुल,   Porāṇametaṁ atula, नेतं अज्जतनामिव;   netaṁ ajjatanāmiva; निन्दन्ति तुण्हिमासीनं,   Nindanti tuṇhimāsīnaṁ, निन्दन्ति बहुभाणिनं;   nindanti bahubhāṇinaṁ; मितभाणिम्पि निन्दन्ति,   Mitabhāṇimpi nindanti, नत्थि लोके अनिन्दितो।   natthi loke anindito.

न चाहु न च भविस्सति,   Na cāhu na ca bhavissati, न चेतरहि विज्जति;   na cetarahi vijjati; एकन्तं निन्दितो पोसो,   Ekantaṁ nindito poso, एकन्तं वा पसंसितो।   ekantaṁ vā pasaṁsito.

यञ्चे विञ्ञू पसंसन्ति,   Yañce viññū pasaṁsanti, अनुविच्च सुवे सुवे;   anuvicca suve suve; अच्छिद्दवुत्तिं मेधाविं,   Acchiddavuttiṁ medhāviṁ,
Acchiddavuttiṁ → acchinnavuttiṁ (mr) पञ्ञासीलसमाहितं।   paññāsīlasamāhitaṁ.

निक्खं जम्बोनदस्सेव,   Nikkhaṁ jambonadasseva,
Nikkhaṁ → nekkhaṁ (bj, sya-all, pts1ed, pts2ed) को तं निन्दितुमरहति;   ko taṁ ninditumarahati; देवापि नं पसंसन्ति,   Devāpi naṁ pasaṁsanti, ब्रह्मुनापि पसंसितो।   brahmunāpi pasaṁsito.

छब्बग्गियवत्थु   Chabbaggiyavatthu

कायप्पकोपं रक्खेय्य,   Kāyappakopaṁ rakkheyya, कायेन संवुतो सिया;   kāyena saṁvuto siyā; कायदुच्चरितं हित्वा,   Kāyaduccaritaṁ hitvā, कायेन सुचरितं चरे।   kāyena sucaritaṁ care.

वचीपकोपं रक्खेय्य,   Vacīpakopaṁ rakkheyya, वाचाय संवुतो सिया;   vācāya saṁvuto siyā; वचीदुच्चरितं हित्वा,   Vacīduccaritaṁ hitvā, वाचाय सुचरितं चरे।   vācāya sucaritaṁ care.

मनोपकोपं रक्खेय्य,   Manopakopaṁ rakkheyya, मनसा संवुतो सिया;   manasā saṁvuto siyā; मनोदुच्चरितं हित्वा,   Manoduccaritaṁ hitvā, मनसा सुचरितं चरे।   manasā sucaritaṁ care.

कायेन संवुता धीरा,   Kāyena saṁvutā dhīrā, अथो वाचाय संवुता;   atho vācāya saṁvutā; मनसा संवुता धीरा,   Manasā saṁvutā dhīrā, ते वे सुपरिसंवुता।   te ve suparisaṁvutā.

कोधवग्गो सत्तरसमो।   Kodhavaggo sattarasamo.