“Virūpakkhehi me mettaṁ, mettaṁ erāpathehi me; Chabyāputtehi me mettaṁ, mettaṁ kaṇhāgotamakehi ca.

Apādakehi me mettaṁ, mettaṁ dvipādakehi me; Catuppadehi me mettaṁ, mettaṁ bahuppadehi me.

Mā maṁ apādako hiṁsi, mā maṁ hiṁsi dvipādako; Mā maṁ catuppado hiṁsi, mā maṁ hiṁsi bahuppado.

Sabbe sattā sabbe pāṇā, sabbe bhūtā ca kevalā; Sabbe bhadrāni passantu, mā kañci pāpamāgamā.
kañci → kiñci (sya1ed, sya2ed, mr)

Appamāṇo buddho, appamāṇo dhammo; Appamāṇo saṅgho, pamāṇavantāni sarīsapāni;
sarīsapāni → siriṁsapāni (bj, sya1ed, sya2ed, pts-vp-pli1) Ahivicchikasatapadī, uṇṇanābhi sarabū mūsikā.
uṇṇanābhi → uṇṇānābhi (bj, pts-vp-pli1); uṇṇānābhī (sya1ed, sya2ed)

Katā me rakkhā katā me parittā, paṭikkamantu bhūtāni; Sohaṁ namo bhagavato, namo sattannaṁ sammāsambuddhānan”ti.

Khaṇḍajātakaṁ tatiyaṁ.
Khaṇḍajātakaṁ → khandhavattajātakaṁ (bj, pts-vp-pli1); khandhaparittajātakaṁ (sya1ed, sya2ed)