“Adāsi dānāni pure visayha, dadato ca te khayadhammo ahosi; Ito parañce na dadeyya dānaṁ, tiṭṭheyyuṁ te saṁyamantassa bhogā”.

“Anariyamariyena sahassanetta, suduggatenāpi akiccamāhu; Mā vo dhanaṁ taṁ ahu devarāja, yaṁ bhogahetu vijahemu saddhaṁ.
ahu devarāja → janinda ahuvā (bj); ahu vā janinda (sya1ed, sya2ed, pts-vp-pli1)

Yena eko ratho yāti, yāti tenāparo ratho; Porāṇaṁ nihitaṁ vattaṁ, vattataññeva vāsava.
vattataññeva → vaddhataññeva (si); vaḍḍhaṁ vaḍḍhataṁ ñeva (pts-vp-pli1)

Yadi hessati dassāma, asante kiṁ dadāmase; Evaṁbhūtāpi dassāma, mā dānaṁ pamadamhase”ti.

Visayhajātakaṁ dasamaṁ.

Kokilavaggo catuttho.
Kokilavaggo → kokālikavaggo (bj, mr)

Tassuddānaṁ

Ativelapabhāsati jītavaro, vanamajjha rathesabha jimhagamo; Atha jambu tiṇāsanapīṭhavaraṁ, atha taṇḍula mora visayha dasāti.