“‘Namo te buddha vīratthu, vippamuttosi sabbadhi; Byasanamhi anuppatto, tassa me saraṇaṁ bhava’.
Byasanamhi → vyasanaṁ hi (bj)

Siddhattho tassa byākāsi, loke appaṭipuggalo; ‘Mahodadhisamo saṅgho, appameyyo anuttaro.

Tattha tvaṁ viraje khette, anantaphaladāyake; Saṅghe cittaṁ pasādetvā, subījaṁ vāpa ropaya’.
subījaṁ vāpa → subījaṁ cāpi (bj); suvījaṁ vāpi (sya1ed, sya2ed); sukhī bījañca (pts-vp-pli1)

Idaṁ vatvāna sabbaññū, lokajeṭṭho narāsabho; Mameva anusāsitvā, vehāsaṁ nabhamuggami.

Aciraṁ gatamattamhi, sabbaññumhi narāsabhe; Maraṇaṁ samanuppatto, tusitaṁ upapajjahaṁ.

Tadāhaṁ viraje khette, anantaphaladāyake; Saṅghe cittaṁ pasādetvā, kappaṁ saggamhi modahaṁ.

Catunnavutito kappe, pasādamalabhiṁ tadā; Duggatiṁ nābhijānāmi, pasādassa idaṁ phalaṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā sampasādako thero imā gāthāyo abhāsitthāti.
sampasādako → sampasādiko (sya1ed, sya2ed, pts-vp-pli1)

Sampasādakattherassāpadānaṁ chaṭṭhaṁ.