“Yadā devo devakāyā, cavate āyusaṅkhayā; Tayo saddā niccharanti, devānaṁ anumodataṁ.

‘Ito bho sugatiṁ gaccha, manussānaṁ sahabyataṁ; Manussabhūto saddhamme, labha saddhaṁ anuttaraṁ.

Sā te saddhā niviṭṭhāssa, mūlajātā patiṭṭhitā; Yāvajīvaṁ asaṁhīrā, saddhamme suppavedite.

Kāyena kusalaṁ katvā, vācāya kusalaṁ bahuṁ; Manasā kusalaṁ katvā, abyāpajjaṁ nirūpadhiṁ.

Tato opadhikaṁ puññaṁ, katvā dānena taṁ bahuṁ; Aññepi macce saddhamme, brahmacariye nivesaya’.

Imāya anukampāya, devādevaṁ yadā vidū; Cavantaṁ anumodanti, ehi deva punappunaṁ.
deva punappunaṁ → devapuraṁ puna (bj)

‘Saṁvego me tadā āsi, devasaṅghe samāgate;
Saṁvego me → saṁviggohaṁ (sya1ed, sya2ed, pts-vp-pli1) Kaṁsu nāma ahaṁ yoniṁ, gamissāmi ito cuto’.

Mama saṁvegamaññāya, samaṇo bhāvitindriyo; Mamuddharitukāmo so, āgacchi mama santikaṁ.

Sumano nāma nāmena, padumuttarasāvako; Atthadhammānusāsitvā, saṁvejesi mamaṁ tadā.

Dvādasamaṁ bhāṇavāraṁ.

Tassāhaṁ vacanaṁ sutvā, buddhe cittaṁ pasādayiṁ; Taṁ dhīraṁ abhivādetvā, tattha kālaṅkato ahaṁ.

Upapajjiṁ sa tattheva, sukkamūlena codito;
Upapajjiṁ sa → upapajjisaṁ (bj); upapajjissaṁ (pts-vp-pli1) Vasanto mātukucchimhi, puna dhāreti mātuyā.

Tamhā kāyā cavitvāna, tidase upapajjahaṁ; Etthantare na passāmi, domanassamahaṁ tadā.

Tāvatiṁsā cavitvāna, mātukucchiṁ samokkamiṁ; Nikkhamitvāna kucchimhā, kaṇhasukkaṁ ajānahaṁ.

Jātiyā sattavassova, ārāmaṁ pāvisiṁ ahaṁ;
sattavassova → jātiyā sattavassena (sya1ed, sya2ed, pts-vp-pli1) Gotamassa bhagavato, sakyaputtassa tādino.

Vitthārike pāvacane, bāhujaññamhi sāsane;
Vitthārike → vitthārite (bj, mr); vitthārake (pts-vp-pli1) Addasaṁ sāsanakare, bhikkhavo tattha satthuno.

Sāvatthi nāma nagaraṁ, rājā tatthāsi kosalo; Rathena nāgayuttena, upesi bodhimuttamaṁ.

Tassāhaṁ nāgaṁ disvāna, pubbakammaṁ anussariṁ; Añjaliṁ paggahetvāna, samayaṁ agamāsahaṁ.

Jātiyā sattavassova, pabbajiṁ anagāriyaṁ; Yo so buddhaṁ upaṭṭhāsi, ānando nāma sāvako.

Gatimā dhitimā ceva, satimā ca bahussuto; Rañño cittaṁ pasādento, niyyādesi mahājuti.

Tassāhaṁ dhammaṁ sutvāna, pubbakammaṁ anussariṁ; Tattheva ṭhitako santo, arahattamapāpuṇiṁ.

Ekaṁsaṁ cīvaraṁ katvā, sire katvāna añjaliṁ; Sambuddhaṁ abhivādetvā, imaṁ vācaṁ udīrayiṁ.

‘Padumuttarabuddhassa, dvipadindassa satthuno; Nigguṇḍipupphaṁ paggayha, sīhāsane ṭhapesahaṁ.

Tena kammena dvipadinda, lokajeṭṭha narāsabha; Pattomhi acalaṁ ṭhānaṁ, hitvā jayaparājayaṁ’.

Pañcavīsasahassamhi, kappānaṁ manujādhipā; Abbudanirabbudāni, aṭṭhaṭṭhāsiṁsu khattiyā.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā nigguṇḍipupphiyo thero imā gāthāyo abhāsitthāti.

Nigguṇḍipupphiyattherassāpadānaṁ sattamaṁ.