“Sataraṁsi nāma bhagavā, sayambhū aparājito; Vivekakāmo sambuddho, gocarāyābhinikkhami.

Phalahattho ahaṁ disvā, upagacchiṁ narāsabhaṁ; Pasannacitto sumano, avaṭaṁ adadiṁ phalaṁ.
avaṭaṁ → avaṇṭaṁ (bj); ambaṭaṁ (sya1ed, sya2ed); avaṇṭam (pts-vp-pli1)

Catunnavutito kappe, yaṁ phalamadadiṁ ahaṁ; Duggatiṁ nābhijānāmi, phaladānassidaṁ phalaṁ.

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā avaṭaphaladāyako thero imā gāthāyo abhāsitthāti.
avaṭaphaladāyako → avaṇṭaphaladāyako (bj, pts-vp-pli1); ambaṭaphaladāyako (sya1ed, sya2ed)

Avaṭaphaladāyakattherassāpadānaṁ paṭhamaṁ.