“Sumedho nāma sambuddho, gacchate antarāpaṇe; Okkhittacakkhu mitabhāṇī, satimā saṁvutindriyo.
Okkhittacakkhu → khittacakkhu (si, pts-vp-pli1, mr)

Pañca uppalahatthāni, āveḷatthaṁ ahaṁsu me; Tena buddhaṁ apūjesiṁ, pasanno sehi pāṇibhi.

Āropitā ca te pupphā, chadanaṁ assu satthuno; Samādhiṁsu mahānāgaṁ, sissā ācariyaṁ yathā.
Samādhiṁsu → saṁsāviṁsu (bj, pts-vp-pli1); samādhīsu (sya1ed, sya2ed)

Tiṁsakappasahassamhi, yaṁ pupphamabhiropayiṁ; Duggatiṁ nābhijānāmi, buddhapūjāyidaṁ phalaṁ.

Ito vīsakappasate, ahesuṁ pañca khattiyā; Hatthiyā nāma nāmena, cakkavattī mahabbalā.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā pañcahatthiyo thero imā gāthāyo abhāsitthāti.

Pañcahatthiyattherassāpadānaṁ pañcamaṁ.