“Migaluddo pure āsiṁ, vipine vicaraṁ ahaṁ; Addasaṁ virajaṁ buddhaṁ, sabbadhammāna pāraguṁ.

Kurañciyaphalaṁ gayha, buddhaseṭṭhassadāsahaṁ;
Kurañciyaphalaṁ → kurañjiyaphalaṁ (bj, sya1ed, sya2ed); kureñjiyaphalaṁ (pts-vp-pli1) Puññakkhettassa tādino, pasanno sehi pāṇibhi.

Ekatiṁse ito kappe, yaṁ phalaṁ adadiṁ tadā; Duggatiṁ nābhijānāmi, phaladānassidaṁ phalaṁ.

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

Svāgataṁ vata me āsi, buddhaseṭṭhassa santike; Tisso vijjā anuppattā, kataṁ buddhassa sāsanaṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā kurañciyaphaladāyako thero imā gāthāyo abhāsitthāti.
kurañciyaphaladāyako → kurañjiyaphaladāyako (bj, sya1ed, sya2ed); kureñjiyaphaladāyako (pts-vp-pli1)

Kurañciyaphaladāyakattherassāpadānaṁ paṭhamaṁ.