“Usabhaṁ pavaraṁ vīraṁ, mahesiṁ vijitāvinaṁ; Suvaṇṇavaṇṇaṁ sambuddhaṁ, ko disvā nappasīdati.

Himavāvāparimeyyo, sāgarova duruttaro; Tatheva jhānaṁ buddhassa, ko disvā nappasīdati.

Vasudhā yathāppameyyā, cittā vanavaṭaṁsakā; Tatheva sīlaṁ buddhassa, ko disvā nappasīdati.

Anilañjasāsaṅkhubbho, yathākāso asaṅkhiyo;
Anilañjasāsaṅkhubbho → anilajova asaṅkhobho (bj) Tatheva ñāṇaṁ buddhassa, ko disvā nappasīdati.

Imāhi catugāthāhi, brāhmaṇo senasavhayo; Buddhaseṭṭhaṁ thavitvāna, siddhatthaṁ aparājitaṁ.

Catunnavutikappāni, duggatiṁ nupapajjatha; Sugatiṁ sukhasampattiṁ, anubhosimanappakaṁ.
Sugatiṁ sukhasampattiṁ → sugatīsu susampattiṁ (bj, sya1ed, sya2ed, pts-vp-pli1)

Catunnavutito kappe, thavitvā lokanāyakaṁ; Duggatiṁ nābhijānāmi, thomanāya idaṁ phalaṁ.
thomanāya → thomanassa (sya1ed, sya2ed)

Cātuddasamhi kappamhi, caturo āsumuggatā; Sattaratanasampannā, cakkavattī mahabbalā.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā parappasādako thero imā gāthāyo abhāsitthāti.

Parappasādakattherassāpadānaṁ catutthaṁ.