“Susukkakhandhaṁ abhiruyha nāgaṁ, akācinaṁ dantiṁ baliṁ mahājavaṁ; Abhiruyha gajavaraṁ sukappitaṁ, idhāgamā vehāyasaṁ antalikkhe.
Abhiruyha → āruyha (sya1ed, sya2ed, pts-vp-pli1-2) | gajavaraṁ → gajaṁ pavaraṁ (sya1ed, sya2ed, pts-vp-pli1)

Nāgassa dantesu duvesu nimmitā, acchodakā paduminiyo suphullā; Padumesu ca tūriyagaṇā pavajjare, imā ca naccanti manoharāyo.

Deviddhipattosi mahānubhāvo, manussabhūto kimakāsi puññaṁ; Kenāsi evaṁ jalitānubhāvo, vaṇṇo ca te sabbadisā pabhāsatī”ti.

So devaputto attamano, moggallānena pucchito; Pañhaṁ puṭṭho viyākāsi, yassa kammassidaṁ phalaṁ.

“Aṭṭheva muttapupphāni, kassapassa mahesino;
mahesino → bhagavato (sya1ed, sya2ed, mr) Thūpasmiṁ abhiropesiṁ, pasanno sehi pāṇibhi.

Tena metādiso vaṇṇo, …pe… vaṇṇo ca me sabbadisā pabhāsatī”ti.

Paṭhamanāgavimānaṁ dasamaṁ.