“Tadā te bhojayitvāna, sasaṅghaṁ lokanāyakaṁ; Upagacchuṁ saraṇaṁ tassa, dīpaṅkarassa satthuno.

Saraṇāgamane kañci, nivesesi tathāgato; Kañci pañcasu sīlesu, sīle dasavidhe paraṁ.

Kassaci deti sāmaññaṁ, caturo phalamuttame; Kassaci asame dhamme, deti so paṭisambhidā.

Kassaci varasamāpattiyo, aṭṭha deti narāsabho; Tisso kassaci vijjāyo, chaḷabhiññā pavecchati.

Tena yogena janakāyaṁ, ovadati mahāmuni; Tena vitthārikaṁ āsi, lokanāthassa sāsanaṁ.

Mahāhanusabhakkhandho, dīpaṅkarassa nāmako; Bahū jane tārayati, parimoceti duggatiṁ.

Bodhaneyyaṁ janaṁ disvā, satasahassepi yojane; Khaṇena upagantvāna, bodheti taṁ mahāmuni.

Paṭhamābhisamaye buddho, koṭisatamabodhayi; Dutiyābhisamaye nātho, navutikoṭimabodhayi.

Yadā ca devabhavanamhi, buddho dhammamadesayi; Navutikoṭisahassānaṁ, tatiyābhisamayo ahu.

Sannipātā tayo āsuṁ, dīpaṅkarassa satthuno; Koṭisatasahassānaṁ, paṭhamo āsi samāgamo.

Puna nāradakūṭamhi, pavivekagate jine; Khīṇāsavā vītamalā, samiṁsu satakoṭiyo.

Yamhi kāle mahāvīro, sudassanasiluccaye; Navakoṭisahassehi, pavāresi mahāmuni.

Dasavīsasahassānaṁ, dhammābhisamayo ahu; Ekadvinnaṁ abhisamayā, gaṇanāto asaṅkhiyā.

Vitthārikaṁ bāhujaññaṁ, iddhaṁ phītaṁ ahū tadā; Dīpaṅkarassa bhagavato, sāsanaṁ suvisodhitaṁ.

Cattāri satasahassāni, chaḷabhiññā mahiddhikā; Dīpaṅkaraṁ lokaviduṁ, parivārenti sabbadā.

Ye keci tena samayena, jahanti mānusaṁ bhavaṁ; Apattamānasā sekhā, garahitā bhavanti te.

Supupphitaṁ pāvacanaṁ, arahantehi tādihi; Khīṇāsavehi vimalehi, upasobhati sabbadā.

Nagaraṁ rammavatī nāma, sudevo nāma khattiyo; Sumedhā nāma janikā, dīpaṅkarassa satthuno.

Dasavassasahassāni, agāraṁ ajjha so vasi;
vasi → ajjhāvasī jino (sya1ed, sya2ed, mr); so vasī (pts-vp-pli1-2) Haṁsā koñcā mayūrā ca, tayo pāsādamuttamā.

Tīṇi satasahassāni, nāriyo samalaṅkatā; Padumā nāma sā nārī, usabhakkhandho atrajo.

Nimitte caturo disvā, hatthiyānena nikkhami; Anūnadasamāsāni, padhāne padahī jino.

Padhānacāraṁ caritvāna, abujjhi mānasaṁ muni; Brahmunā yācito santo, dīpaṅkaro mahāmuni.

Vatti cakkaṁ mahāvīro, nandārāme sirīghare;
sirīghare → sirighare (bj); vasī jino (sya1ed, sya2ed); sirīdhare (pts-vp-pli2) Nisinno sirīsamūlamhi, akā titthiyamaddanaṁ.

Sumaṅgalo ca tisso ca, ahesuṁ aggasāvakā; Sāgato nāmupaṭṭhāko, dīpaṅkarassa satthuno.
Sāgato → sobhito (mr)

Nandā ceva sunandā ca, ahesuṁ aggasāvikā; Bodhi tassa bhagavato, pipphalīti pavuccati.

Tapussabhallikā nāma, ahesuṁ aggupaṭṭhakā;
Tapussabhallikā → tapassubhallikā (bj, pts-vp-pli2) Sirimā koṇā upaṭṭhikā, dīpaṅkarassa satthuno.

Asītihatthamubbedho, dīpaṅkaro mahāmuni; Sobhati dīparukkhova, sālarājāva phullito.

Satasahassavassāni, āyu tassa mahesino; Tāvatā tiṭṭhamāno so, tāresi janataṁ bahuṁ.

Jotayitvāna saddhammaṁ, santāretvā mahājanaṁ; Jalitvā aggikkhandhova, nibbuto so sasāvako.

Sā ca iddhi so ca yaso, tāni ca pādesu cakkaratanāni; Sabbaṁ tamantarahitaṁ, nanu rittā sabbasaṅkhārā.
tamantarahitaṁ → samantarahitaṁ (bj, sya1ed, sya2ed, pts-vp-pli1-2, mr) sabbasaṅkhārā → sabbasaṅkhārāti (bj, sya1ed, sya2ed)

Dīpaṅkaro jino satthā, nandārāmamhi nibbuto; Tatthevassa jinathūpo, chattiṁsubbedhayojano”ti.

Dīpaṅkarassa bhagavato vaṁso paṭhamo.
Dīpaṅkarassa bhagavato vaṁso → dīpaṅkarabuddhavaṁso (bj, sya1ed, sya2ed)