“Yathā cāpo ninnamati, jiyā cāpi nikūjati; Haññate nūna manojo, migarājā sakhā mama.

Handa dāni vanantāni, pakkamāmi yathāsukhaṁ; Netādisā sakhā honti, labbhā me jīvato sakhā”.

“Na pāpajanasaṁsevī, accantaṁ sukhamedhati; Manojaṁ passa semānaṁ, giriyassānusāsanī”.
giriyassānusāsanī → ariyassānusāsanī (mr)

“Na pāpasampavaṅkena, mātā puttena nandati; Manojaṁ passa semānaṁ, acchannaṁ samhi lohite”.
acchannaṁ → sacchannaṁ (mr)

“Evamāpajjate poso, pāpiyo ca nigacchati; Yo ve hitānaṁ vacanaṁ, na karoti atthadassinaṁ”.

“Evañca so hoti tato ca pāpiyo, yo uttamo adhamajanūpasevī; Passuttamaṁ adhamajanūpasevitaṁ, migādhipaṁ saravaraveganiddhutaṁ”.
adhamajanūpasevitaṁ → … seviṁ (sya1ed, sya2ed)

“Nihīyati puriso nihīnasevī, na ca hāyetha kadāci tulyasevī; Seṭṭhamupagamaṁ udeti khippaṁ, tasmāttanā uttaritaraṁ bhajethā”ti.
Seṭṭhamupagamaṁ → … mupanamaṁ (bj, pts-vp-pli1 an3.26:1 [26. Sevitabbasutta]); … mupagamañca (sya1ed, sya2ed) tasmāttanā uttaritaraṁ → tasmā attano uttariṁ (bj, pts-vp-pli1); tasmā attano uttaraṁ (sya1ed, sya2ed)

Manojajātakaṁ dutiyaṁ.