“Dhammo have hato hanti, nāhato hanti kiñcanaṁ;
kiñcanaṁ → kiñcinaṁ (sya1ed, sya2ed); kañcinaṁ (pts-vp-pli1) Tasmā hi dhammaṁ na hane, mā tvaṁ dhammo hato hani.
tvaṁ → taṁ (bj, sya1ed, sya2ed, pts-vp-pli1)

Alikaṁ bhāsamānassa, apakkamanti devatā; Pūtikañca mukhaṁ vāti, sakaṭṭhānā ca dhaṁsati; Yo jānaṁ pucchito pañhaṁ, aññathā naṁ viyākare.

Sace hi saccaṁ bhaṇasi, hohi rāja yathā pure; Musā ce bhāsase rāja, bhūmiyaṁ tiṭṭha cetiya.

Akāle vassatī tassa, kāle tassa na vassati; Yo jānaṁ pucchito pañhaṁ, aññathā naṁ viyākare.

Sace hi saccaṁ bhaṇasi, hohi rāja yathā pure; Musā ce bhāsase rāja, bhūmiṁ pavisa cetiya.

Jivhā tassa dvidhā hoti, uragasseva disampati; Yo jānaṁ pucchito pañhaṁ, aññathā naṁ viyākare.

Sace hi saccaṁ bhaṇasi, hohi rāja yathā pure; Musā ce bhāsase rāja, bhiyyo pavisa cetiya.

Jivhā tassa na bhavati, macchasseva disampati; Yo jānaṁ pucchito pañhaṁ, aññathā naṁ viyākare.

Sace hi saccaṁ bhaṇasi, hohi rāja yathā pure; Musā ce bhāsase rāja, bhiyyo pavisa cetiya.

Thiyova tassa jāyanti, na pumā jāyare kule;
Thiyova tassa jāyanti → thiyo tassa pajāyanti (pts-vp-pli1, mr) Yo jānaṁ pucchito pañhaṁ, aññathā naṁ viyākare.

Sace hi saccaṁ bhaṇasi, hohi rāja yathā pure; Musā ce bhāsase rāja, bhiyyo pavisa cetiya.

Puttā tassa na bhavanti, pakkamanti disodisaṁ; Yo jānaṁ pucchito pañhaṁ, aññathā naṁ viyākare.

Sace hi saccaṁ bhaṇasi, hohi rāja yathā pure; Musā ce bhāsase rāja, bhiyyo pavisa cetiya”.

“Sa rājā isinā satto, antalikkhacaro pure; Pāvekkhi pathaviṁ cecco, hīnatto patva pariyāyaṁ.
patva pariyāyaṁ → attapariyāyaṁ (bj, sya1ed, sya2ed); pattapariyāyaṁ (si -nissya)

Tasmā hi chandāgamanaṁ, nappasaṁsanti paṇḍitā; Aduṭṭhacitto bhāseyya, giraṁ saccūpasaṁhitanti”.

Cetiyajātakaṁ chaṭṭhaṁ.
Cetiyajātakaṁ → cetiyarājajātakaṁ (sya1ed, sya2ed)