“Ādittasmiṁ agārasmiṁ, yaṁ nīharati bhājanaṁ; Taṁ tassa hoti atthāya, no ca yaṁ tattha ḍayhati.

Evamādīpito loko, jarāya maraṇena ca; Nīharetheva dānena, dinnaṁ hoti sunīhataṁ”.
sunīhataṁ → sunībhataṁ (bj, sya1ed, sya2ed); nībhataṁ (pts-vp-pli1); sunibbhataṁ (mr)

“Yo dhammaladdhassa dadāti dānaṁ, uṭṭhānaviriyādhigatassa jantu; Atikkamma so vetaraṇiṁ yamassa, dibbāni ṭhānāni upeti macco.
vetaraṇiṁ → vettaraṇiṁ (mr)

Dānañca yuddhañca samānamāhu, appāpi santā bahuke jinanti; Appampi ce saddahāno dadāti, teneva so hoti sukhī parattha.

Viceyya dānaṁ sugatappasatthaṁ, ye dakkhiṇeyyā idha jīvaloke; Etesu dinnāni mahapphalāni, bījāni vuttāni yathā sukhette.

Yo pāṇabhūtāni aheṭhayaṁ caraṁ, parūpavādā na karoti pāpaṁ; Bhīruṁ pasaṁsanti na tattha sūraṁ, bhayā hi santo na karonti pāpaṁ.

Hīnena brahmacariyena, khattiye upapajjati; Majjhimena ca devattaṁ, uttamena visujjhati.

Addhā hi dānaṁ bahudhā pasatthaṁ, dānā ca kho dhammapadaṁva seyyo; Pubbeva hi pubbatareva santo, nibbānamevajjhagamuṁ sapaññā”ti.
Pubbeva hi pubbatareva santo → pubbe ca hi pubbatare ca santo (sn1.33:1 [33. Sādhusutta])

Ādittajātakaṁ aṭṭhamaṁ.