“Ekā nisinnā suci saññatūrū, pāsādamāruyha aninditaṅgī; Yācāmi taṁ kinnaranettacakkhu, imekarattiṁ ubhayo vasema”.

“Okiṇṇantaraparikhaṁ, daḷhamaṭṭālakoṭṭhakaṁ; Rakkhitaṁ khaggahatthehi, duppavesamidaṁ puraṁ.

Daharassa yuvino cāpi, āgamo ca na vijjati; Atha kena nu vaṇṇena, saṅgamaṁ icchase mayā”.

“Yakkhohamasmi kalyāṇi, āgatosmi tavantike;
tavantike → tavantikaṁ (bj); tamantikaṁ (pts-vp-pli1) Tvaṁ maṁ nandaya bhaddante, puṇṇakaṁsaṁ dadāmi te”.
nandaya → nandassu (sya1ed, sya2ed, mr)

“Devaṁ va yakkhaṁ atha vā manussaṁ, na patthaye udayamaticca aññaṁ; Gaccheva tvaṁ yakkha mahānubhāva, mā cassu gantvā punarāvajittha”.

“Yā sā rati uttamā kāmabhoginaṁ, yaṁ hetu sattā visamaṁ caranti; Mā taṁ ratiṁ jīyi tuvaṁ sucimhite, dadāmi te rūpiyaṁ kaṁsapūraṁ”.

“Nāriṁ naro nijjhapayaṁ dhanena, ukkaṁsatī yattha karoti chandaṁ; Vipaccanīko tava devadhammo, paccakkhato thokatarena esi”.

“Āyu ca vaṇṇo ca manussaloke, nihīyati manujānaṁ sugatte;
ca vaṇṇo ca → āyuñca vaṇṇañca (bj, pts-vp-pli1) Teneva vaṇṇena dhanampi tuyhaṁ, nihīyati jiṇṇatarāsi ajja.

Evaṁ me pekkhamānassa, rājaputti yasassini; Hāyateva tava vaṇṇo, ahorattānamaccaye”.
Hāyateva tava → hāyate vata te (bj, sya1ed, sya2ed, mr); hāyateva tato (pts-vp-pli1)

“Imināva tvaṁ vayasā, rājaputti sumedhase; Brahmacariyaṁ careyyāsi, bhiyyo vaṇṇavatī siyā”.

“Devā na jīranti yathā manussā, gattesu tesaṁ valiyo na honti; Pucchāmi taṁ yakkha mahānubhāva, kathaṁ nu devāna sarīradeho”.
kathaṁ nu devāna → kathaṁ na devānaṁ (pts-vp-pli1)

“Devā na jīranti yathā manussā, gattesu tesaṁ valiyo na honti; Suve suve bhiyyatarova tesaṁ, dibbo ca vaṇṇo vipulā ca bhogā”.
bhiyyatarova → bhiyyataro ca (mr)

“Kiṁsūdha bhītā janatā anekā, maggo ca nekāyatanaṁ pavutto; Pucchāmi taṁ yakkha mahānubhāva, katthaṭṭhito paralokaṁ na bhāye”.

“Vācaṁ manañca paṇidhāya sammā, kāyena pāpāni akubbamāno; Bahunnapānaṁ gharamāvasanto, saddho mudū saṁvibhāgī vadaññū; Saṅgāhako sakhilo saṇhavāco, etthaṭṭhito paralokaṁ na bhāye”.

“Anusāsasi maṁ yakkha, yathā mātā yathā pitā; Uḷāravaṇṇaṁ pucchāmi, ko nu tvamasi subrahā”.

“Udayohamasmi kalyāṇi, saṅgarattā idhāgato;
saṅgarattā idhāgato → saṅgaratthā idhāgato (bj, pts-vp-pli1); saṅkaratthāyidhāgato (sya1ed, sya2ed) Āmanta kho taṁ gacchāmi, muttosmi tava saṅgarā”.
saṅgarā → saṅkarā (sya1ed, sya2ed, mr)

“Sace kho tvaṁ udayosi, saṅgarattā idhāgato; Anusāsa maṁ rājaputta, yathāssa puna saṅgamo”.

“Atipatati vayo khaṇo tatheva, ṭhānaṁ natthi dhuvaṁ cavanti sattā;
Atipatati → adhipatati (bj, pts-vp-pli1) Parijiyyati addhuvaṁ sarīraṁ, udaye mā pamāda carassu dhammaṁ.
udaye mā pamāda → mā pamādaṁ (bj)

Kasiṇā pathavī dhanassa pūrā, ekasseva siyā anaññadheyyā; Tañcāpi jahati avītarāgo, udaye mā pamāda carassu dhammaṁ.
jahati → jahāti (bj, sya1ed, sya2ed, pts-vp-pli1); jahātī (?)

Mātā ca pitā ca bhātaro ca, bhariyā yāpi dhanena hoti kītā;
bhariyā yāpi dhanena hoti kītā → bhariyā sāmiko sadhanena hoti (sya1ed, sya2ed); bhariyāpi dhanena honti atittā (mr) Te cāpi jahanti aññamaññaṁ, udaye mā pamāda carassu dhammaṁ.

Kāyo parabhojananti ñatvā, saṁsāre sugatiñca duggatiñca;
parabhojananti ñatvā → kāyo parabhojananti viditvā (sya1ed, sya2ed); kāyo ca parabhojanaṁ viditvā (mr) sugatiñca duggatiñca → sugatī ca duggatī ca (bj, sya1ed, sya2ed, pts-vp-pli1); suggatiṁ duggatiñca (mr) Ittaravāsoti jāniyāna, udaye mā pamāda carassu dhammaṁ”.

“Sādhu bhāsatiyaṁ yakkho, appaṁ maccāna jīvitaṁ;
bhāsatiyaṁ → bhāsatayaṁ (bj, pts-vp-pli1) Kasirañca parittañca, tañca dukkhena saṁyutaṁ; Sāhaṁ ekā pabbajissāmi, hitvā kāsiṁ surundhanan”ti.

Udayajātakaṁ catutthaṁ.