Migaluddo mahārājā, pañcālānaṁ rathesabho; Nikkhanto saha senāya, ogaṇo vanamāgamā.

Tatthaddasā araññasmiṁ, takkarānaṁ kuṭiṁ kataṁ; Tassā kuṭiyā nikkhamma, suvo luddāni bhāsati.
Tassā → tasmā (sya1ed, sya2ed, mr)

“Sampannavāhano poso, yuvā sammaṭṭhakuṇḍalo;
sammaṭṭhakuṇḍalo → … kuṇḍalī (sya1ed, sya2ed, mr) Sobhati lohituṇhīso, divā sūriyova bhāsati.

Majjhanhike sampatike, sutto rājā sasārathi;
Majjhanhike → majjhantike (sabbattha) Handassābharaṇaṁ sabbaṁ, gaṇhāma sāhasā mayaṁ.
sāhasā → sahasā (bj, sya1ed, sya2ed, pts-vp-pli1)

Nisīthepi raho dāni, sutto rājā sasārathi; Ādāya vatthaṁ maṇikuṇḍalañca, hantvāna sākhāhi avattharāma”.

“Kiṁ nu ummattarūpova, sattigumba pabhāsasi; Durāsadā hi rājāno, aggi pajjalito yathā”.

“Atha tvaṁ patikolamba, matto thullāni gajjasi; Mātari mayhaṁ naggāya, kiṁ nu tvaṁ vijigucchase”.

“Uṭṭhehi samma taramāno, rathaṁ yojehi sārathi; Sakuṇo me na ruccati, aññaṁ gacchāma assamaṁ”.

“Yutto ratho mahārāja, yutto ca balavāhano; Adhitiṭṭha mahārāja, aññaṁ gacchāma assamaṁ”.

“Ko numeva gatā sabbe, ye asmiṁ paricārakā;
numeva gatā → kva nu'me'pagatā (?) Esa gacchati pañcālo, mutto tesaṁ adassanā.

Kodaṇḍakāni gaṇhatha, sattiyo tomarāni ca; Esa gacchati pañcālo, mā vo muñcittha jīvataṁ”.
jīvataṁ → jīvitaṁ (bahūsu)

Athāparo paṭinandittha, suvo lohitatuṇḍako; “Svāgataṁ te mahārāja, atho te adurāgataṁ; Issarosi anuppatto, yaṁ idhatthi pavedaya.

Tindukāni piyālāni, madhuke kāsumāriyo; Phalāni khuddakappāni, bhuñja rāja varaṁ varaṁ.

Idampi pānīyaṁ sītaṁ, ābhataṁ girigabbharā; Tato piva mahārāja, sace tvaṁ abhikaṅkhasi.

Araññaṁ uñchāya gatā, ye asmiṁ paricārakā; Sayaṁ uṭṭhāya gaṇhavho, hatthā me natthi dātave”.

“Bhaddako vatayaṁ pakkhī, dijo paramadhammiko; Atheso itaro pakkhī, suvo luddāni bhāsati.

‘Etaṁ hanatha bandhatha, mā vo muñcittha jīvataṁ’; Iccevaṁ vilapantassa, sotthiṁ pattosmi assamaṁ”.
sotthiṁ → sotthī (sya1ed, sya2ed)

“Bhātarosma mahārāja, sodariyā ekamātukā; Ekarukkhasmiṁ saṁvaḍḍhā, nānākhettagatā ubho.

Sattigumbo ca corānaṁ, ahañca isīnaṁ idha; Asataṁ so, sataṁ ahaṁ, tena dhammena no vinā”.

“Tattha vadho ca bandho ca, nikatī vañcanāni ca; Ālopā sāhasākārā, tāni so tattha sikkhati.

Idha saccañca dhammo ca, ahiṁsā saṁyamo damo; Āsanūdakadāyīnaṁ, aṅke vaddhosmi bhāradha”.
bhāradha → bhārata (bj, sya1ed, sya2ed, pts-vp-pli1)

“Yaṁ yañhi rāja bhajati, santaṁ vā yadi vā asaṁ; Sīlavantaṁ visīlaṁ vā, vasaṁ tasseva gacchati.

Yādisaṁ kurute mittaṁ, yādisaṁ cūpasevati; Sopi tādisako hoti, sahavāso hi tādiso.
sahavāso hi → sahavāsopi (sya1ed, sya2ed, mr)

Sevamāno sevamānaṁ, samphuṭṭho samphusaṁ paraṁ; Saro diddho kalāpaṁva, alittamupalimpati; Upalepabhayā dhīro, neva pāpasakhā siyā.
Upalepabhayā → upalimpabhayā (sya1ed, sya2ed, mr)

Pūtimacchaṁ kusaggena, yo naro upanayhati; Kusāpi pūti vāyanti, evaṁ bālūpasevanā.
pūti → pūtī (bj, pts-vp-pli1)

Tagarañca palāsena, yo naro upanayhati; Pattāpi surabhi vāyanti, evaṁ dhīrūpasevanā.
surabhi → sūrabhi (bj); surabhī (sya1ed, sya2ed, pts-vp-pli1)

Tasmā pattapuṭasseva, ñatvā sampākamattano;
pattapuṭasseva → phalapuṭasseva (bj, pts-vp-pli1); palāsapuṭasseva (sya1ed, sya2ed, mr); palapuṭasseva (Ma-aka) Asante nopaseveyya, sante seveyya paṇḍito; Asanto nirayaṁ nenti, santo pāpenti suggatin”ti.

Sattigumbajātakaṁ sattamaṁ.