“Cirassaṁ vata passāma, brāhmaṇaṁ devavaṇṇinaṁ; Mahājaṭaṁ khāridharaṁ, paṅkadantaṁ rajassiraṁ.
khāridharaṁ → bhāradharaṁ (pts-vp-pli1)

Cirassaṁ vata passāma, isiṁ dhammaguṇe rataṁ; Kāsāyavatthavasanaṁ, vākacīraṁ paṭicchadaṁ.

Āsanaṁ udakaṁ pajjaṁ, paṭigaṇhātu no bhavaṁ; Agghe bhavantaṁ pucchāma, agghaṁ kurutu no bhavaṁ”.

“Adhicca vede pariyesa vittaṁ, putte gahe tāta patiṭṭhapetvā;
gahe → gehe (bj, sya1ed, sya2ed, pts-vp-pli1) Gandhe rase paccanubhuyya sabbaṁ, araññaṁ sādhu muni so pasattho”.
paccanubhuyya → paccanubhotva (sya1ed, sya2ed); paccanubhutva (pts-vp-pli1) so → te (bj, pts-vp-pli1)

“Vedā na saccā na ca vittalābho, na puttalābhena jaraṁ vihanti; Gandhe rase muccanamāhu santo, sakammunā hoti phalūpapatti”.
muccanamāhu → muñcanamāhu (bj, mr) sakammunā → sakammanā (bj, pts-vp-pli1)

“Addhā hi saccaṁ vacanaṁ tavetaṁ, sakammunā hoti phalūpapatti; Jiṇṇā ca mātāpitaro tavīme, passeyyuṁ taṁ vassasataṁ arogaṁ”.
tavīme → tavayime (bj, sya1ed, sya2ed, pts-vp-pli1) arogaṁ → arogyaṁ (sya1ed, sya2ed, mr)

“Yassassa sakkhī maraṇena rāja, jarāya mettī naravīraseṭṭha; Yo cāpi jaññā na marissaṁ kadāci, passeyyuṁ taṁ vassasataṁ arogaṁ.

Yathāpi nāvaṁ puriso dakamhi, ereti ce naṁ upaneti tīraṁ; Evampi byādhī satataṁ jarā ca, upaneti maccaṁ vasamantakassa”.
maccaṁ → maccu (sya1ed, sya2ed)

“Paṅko ca kāmā palipo ca kāmā, manoharā duttarā maccudheyyā; Etasmiṁ paṅke palipe byasannā, hīnattarūpā na taranti pāraṁ.
byasannā → visannā (sya1ed, sya2ed, mr)

Ayaṁ pure luddamakāsi kammaṁ, svāyaṁ gahīto na hi mokkhito me; Orundhiyā naṁ parirakkhissāmi, māyaṁ puna luddamakāsi kammaṁ”.

“Gavaṁva naṭṭhaṁ puriso yathā vane, anvesatī rāja apassamāno;
Gavaṁva → gāvaṁva (bj) anvesatī → pariyesati (bj); anvesati (sya1ed, sya2ed); pariyesatī (pts-vp-pli1) Evaṁ naṭṭho esukārī mamattho, sohaṁ kathaṁ na gaveseyyaṁ rāja.

Hiyyoti hiyyati poso, pareti parihāyati;
hiyyati → hīyati (bj) Anāgataṁ netamatthīti ñatvā, uppannachandaṁ ko panudeyya dhīro”.

“Passāmi vohaṁ daharaṁ kumāriṁ, mattūpamaṁ ketakapupphanettaṁ;
daharaṁ → dahariṁ (bj, sya1ed, sya2ed, pts-vp-pli1, mr) Abhuttabhoge paṭhame vayasmiṁ, ādāya maccu vajate kumāriṁ.
Abhuttabhoge → abhutvā bhoge (sya1ed, sya2ed, Ma-aka); abhutva bhoge (pts-vp-pli1); bhoge abhutvā (mr)

Yuvā sujāto sumukho sudassano, sāmo kusumbhaparikiṇṇamassu; Hitvāna kāme paṭikacca gehaṁ, anujāna maṁ pabbajissāmi deva”.
paṭikacca → paṭigacca (bj); paṭigaccha (sya1ed, sya2ed, pts-vp-pli1)

“Sākhāhi rukkho labhate samaññaṁ, pahīnasākhaṁ pana khāṇumāhu; Pahīnaputtassa mamajja bhoti, vāseṭṭhi bhikkhācariyāya kālo”.

“Aghasmi koñcāva yathā himaccaye, katāni jālāni padāliya haṁsā;
Aghasmi → aghasmiṁ (bj, sya1ed, sya2ed) katāni → tantāni (bj, pts-vp-pli1) | padāliya → padāḷeyya (bj); padāleyyu (sya1ed, sya2ed) Gacchanti puttā ca patī ca mayhaṁ, sāhaṁ kathaṁ nānuvaje pajānaṁ”.

“Ete bhutvā vamitvā ca, pakkamanti vihaṅgamā; Ye ca bhutvāna vamiṁsu, te me hatthattamāgatā.
hatthattamāgatā → hatthattha … (bj, sya1ed, sya2ed, pts-vp-pli1)

Avamī brāhmaṇo kāme, so tvaṁ paccāvamissasi; Vantādo puriso rāja, na so hoti pasaṁsiyo”.

“Paṅke ca posaṁ palipe byasannaṁ, balī yathā dubbalamuddhareyya;
Paṅke ca → paṅkeva (bj, pts-vp-pli1) Evampi maṁ tvaṁ udatāri bhoti, pañcāli gāthāhi subhāsitāhi”.

Idaṁ vatvā mahārājā, esukārī disampati; Raṭṭhaṁ hitvāna pabbaji, nāgo chetvāva bandhanaṁ.

“Rājā ca pabbajjamarocayittha, raṭṭhaṁ pahāya naravīraseṭṭho; Tuvampi no hohi yatheva rājā, amhehi guttā anusāsa rajjaṁ”.

“Rājā ca pabbajjamarocayittha, raṭṭhaṁ pahāya naravīraseṭṭho; Ahampi ekā carissāmi loke, hitvāna kāmāni manoramāni.
ekā → ekāva (bj)

Rājā ca pabbajjamarocayittha, raṭṭhaṁ pahāya naravīraseṭṭho; Ahampi ekā carissāmi loke, hitvāna kāmāni yathodhikāni.

Accenti kālā tarayanti rattiyo, vayoguṇā anupubbaṁ jahanti; Ahampi ekā carissāmi loke, hitvāna kāmāni manoramāni.

Accenti kālā tarayanti rattiyo, vayoguṇā anupubbaṁ jahanti; Ahampi ekā carissāmi loke, hitvāna kāmāni yathodhikāni.

Accenti kālā tarayanti rattiyo, vayoguṇā anupubbaṁ jahanti; Ahampi ekā carissāmi loke, sītibhūtā sabbamaticca saṅgan”ti.
sītibhūtā → sītībhūtā (bj)

Hatthipālajātakaṁ terasamaṁ.