Accherarūpaṁ sugatassa ñāṇaṁ, satthā yathā puggalaṁ byākāsi; Ussannapuññāpi bhavanti heke, parittapuññāpi bhavanti heke.

Ayaṁ kumāro sīvathikāya chaḍḍito, aṅguṭṭhasnehena yāpeti rattiṁ; Na yakkhabhūtā na sarīsapā vā, viheṭhayeyyuṁ katapuññaṁ kumāraṁ.
sarīsapā → siriṁsapā (bj, pts-vp-pli1-2); sirisapā (sya1ed, sya2ed)

Sunakhāpimassa palihiṁsu pāde, dhaṅkā siṅgālā parivattayanti;
siṅgālā → sigālā (bj, pts-vp-pli2) Gabbhāsayaṁ pakkhigaṇā haranti, kākā pana akkhimalaṁ haranti.

Nayimassa rakkhaṁ vidahiṁsu keci, na osadhaṁ sāsapadhūpanaṁ vā;
Nayimassa → na imassa (sya1ed, sya2ed, pts-vp-pli1); nimassa (mr) Nakkhattayogampi na aggahesuṁ, na sabbadhaññānipi ākiriṁsu.
na aggahesuṁ → pana uggahesuṁ (sya1ed, sya2ed); pi na uggahesuṁ (pts-vp-pli1, mr)

Etādisaṁ uttamakicchapattaṁ, rattābhataṁ sīvathikāya chaḍḍitaṁ; Nonītapiṇḍaṁva pavedhamānaṁ, sasaṁsayaṁ jīvitasāvasesaṁ.

Tamaddasā devamanussapūjito, disvā ca taṁ byākari bhūripañño; “Ayaṁ kumāro nagarassimassa, aggakuliko bhavissati bhogato ca”.
bhogato ca → bhogavā ca (sya1ed, sya2ed, mr)

“Kissa vataṁ kiṁ pana brahmacariyaṁ, kissa suciṇṇassa ayaṁ vipāko;
Kissa → kiṁ'sa (?) Etādisaṁ byasanaṁ pāpuṇitvā, taṁ tādisaṁ paccanubhossatiddhin”ti.

Buddhapamukhassa bhikkhusaṅghassa, pūjaṁ akāsi janatā uḷāraṁ; Tatrassa cittassahu aññathattaṁ, vācaṁ abhāsi pharusaṁ asabbhaṁ.

So taṁ vitakkaṁ pavinodayitvā, pītiṁ pasādaṁ paṭiladdhā pacchā; Tathāgataṁ jetavane vasantaṁ, yāguyā upaṭṭhāsi sattarattaṁ.

Tassa vataṁ taṁ pana brahmacariyaṁ, tassa suciṇṇassa ayaṁ vipāko;
Tassa → taṁ'sa (?) Etādisaṁ byasanaṁ pāpuṇitvā, taṁ tādisaṁ paccanubhossatiddhiṁ.

Ṭhatvāna so vassasataṁ idheva, sabbehi kāmehi samaṅgibhūto; Kāyassa bhedā abhisamparāyaṁ, sahabyataṁ gacchati vāsavassāti.

Kumārapetavatthu pañcamaṁ.