“Suvaṇṇavaṇṇo sambuddho, vipassī dakkhiṇāraho; Purakkhato sāvakehi, ārāmā abhinikkhami.

Disvānahaṁ buddhaseṭṭhaṁ, sabbaññuṁ tamanāsakaṁ; Pasannacitto sumano, gaṇṭhipupphaṁ apūjayiṁ.
gaṇṭhipupphaṁ → gandhapupphaṁ (bj); gatamaggaṁ (sya1ed, sya2ed, mr)

Tena cittappasādena, dvipadindassa tādino; Haṭṭho haṭṭhena cittena, puna vandiṁ tathāgataṁ.

Ekanavutito kappe, yaṁ pupphamabhiropayiṁ; Duggatiṁ nābhijānāmi, buddhapūjāyidaṁ phalaṁ.

Ekatālīsito kappe, caraṇo nāma khattiyo; Sattaratanasampanno, cakkavattī mahabbalo.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā gaṇṭhipupphiyo thero imā gāthāyo abhāsitthāti.
gaṇṭhipupphiyo → gandhapupphiyo (bj, sya1ed, sya2ed, mr)

Gaṇṭhipupphiyattherassāpadānaṁ navamaṁ.