“Candabhāgānadītīre, ahosiṁ kinnaro tadā; Pupphabhakkho cahaṁ āsiṁ, pupphānivasano tathā.
pupphānivasano tathā → pupphanivasano tathā (bj); pupphavivasano ca'haṁ (si); pupphānaṁ vasano ahaṁ (sya1ed, sya2ed); pupphānaṁ vasano cahaṁ (pts-vp-pli1)

Atthadassī tu bhagavā, lokajeṭṭho narāsabho; Vipinaggena niyyāsi, haṁsarājāva ambare.

Namo te purisājañña, cittaṁ te suvisodhitaṁ; Pasannamukhavaṇṇosi, vippasannamukhindriyo.

Orohitvāna ākāsā, bhūripañño sumedhaso; Saṅghāṭiṁ pattharitvāna, pallaṅkena upāvisi.

Vilīnaṁ candanādāya, agamāsiṁ jinantikaṁ; Pasannacitto sumano, buddhassa abhiropayiṁ.

Abhivādetvāna sambuddhaṁ, lokajeṭṭhaṁ narāsabhaṁ; Pāmojjaṁ janayitvāna, pakkāmiṁ uttarāmukho.

Aṭṭhārase kappasate, candanaṁ yaṁ apūjayiṁ; Duggatiṁ nābhijānāmi, buddhapūjāyidaṁ phalaṁ.

Catuddase kappasate, ito āsiṁsu te tayo; Rohaṇī nāma nāmena, cakkavattī mahabbalā.
Rohaṇī nāma → rohitā nāma (bj); rohiṇī nāma (sya1ed, sya2ed, pts-vp-pli1)

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā candanapūjanako thero imā gāthāyo abhāsitthāti.
candanapūjanako → candanapūjako (bj, sya1ed, sya2ed, pts-vp-pli1)

Candanapūjanakattherassāpadānaṁ tatiyaṁ.
Aṭṭhamabhāṇavāraṁ.