“Tisso nāmāsi bhagavā, lokajeṭṭho narāsabho; Purakkhato sāvakehi, rathiyaṁ paṭipajjatha.

Pañca uppalahatthā ca, cāturā ṭhapitā mayā; Āhutiṁ dātukāmohaṁ, paggaṇhiṁ vatasiddhiyā.
paggaṇhiṁ vatasiddhiyā → puttomhi hitasiddhiyā (sya1ed, sya2ed); mūgomhi vata siddhiyā (pts-vp-pli1)

Suvaṇṇavaṇṇaṁ sambuddhaṁ, gacchantaṁ antarāpaṇe; Buddharaṁsīhi phuṭṭhosmi, pūjesiṁ dvipaduttamaṁ.
Buddharaṁsīhi phuṭṭhosmi → buddharaṁsyābhiphuṭṭhomhi (bj); buddharaṁsīhi phuṭṭhomhi (sya1ed, sya2ed); buddharaṁsābhighuṭṭhomhi (pts-vp-pli1); buddharaṁsābhighuṭṭhosmi (mr)

Dvenavute ito kappe, yaṁ pupphamabhipūjayiṁ; Duggatiṁ nābhijānāmi, buddhapūjāyidaṁ phalaṁ.

Ito terasakappamhi, pañca susabhasammatā; Sattaratanasampannā, cakkavattī mahabbalā.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā pañcahatthiyo thero imā gāthāyo abhāsitthāti.

Pañcahatthiyattherassāpadānaṁ catutthaṁ.