“Kusāṭakaṁ gahetvāna, upajjhāyassahaṁ pure; Mantañca anusikkhāmi, ganthādosassa pattiyā.
ganthādosassa → kaṇḍabhedassa (bj, pts-vp-pli1); gaṇḍabhedassa (sya1ed, sya2ed)

Addasaṁ virajaṁ buddhaṁ, āhutīnaṁ paṭiggahaṁ; Usabhaṁ pavaraṁ aggaṁ, tissaṁ buddhaṁ gaṇuttamaṁ.
gaṇuttamaṁ → gajuttamaṁ (sya1ed, sya2ed, pts-vp-pli1)

Kusāṭakaṁ pattharitaṁ, akkamantaṁ naruttamaṁ; Samuggataṁ mahāvīraṁ, lokajeṭṭhaṁ narāsabhaṁ.

Disvā taṁ lokapajjotaṁ, vimalaṁ candasannibhaṁ; Avandiṁ satthuno pāde, vippasannena cetasā.

Catunnavutito kappe, yaṁ adāsiṁ kusāṭakaṁ; Duggatiṁ nābhijānāmi, kusāṭakassidaṁ phalaṁ.

Sattatiṁse ito kappe, eko āsiṁ janādhipo; Sunando nāma nāmena, cakkavattī mahabbalo.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā akkantasaññako thero imā gāthāyo abhāsitthāti.

Akkantasaññakattherassāpadānaṁ aṭṭhamaṁ.