“Nisinno pāsādavare, nārīgaṇapurakkhato; Byādhitaṁ samaṇaṁ disvā, abhināmesahaṁ gharaṁ.

Upaviṭṭhaṁ mahāvīraṁ, devadevaṁ narāsabhaṁ; Sappitelaṁ mayā dinnaṁ, siddhatthassa mahesino.

Passaddhadarathaṁ disvā, vippasannamukhindriyaṁ; Vanditvā satthuno pāde, anusaṁsāvayiṁ pure.

Disvā maṁ suppasannattaṁ, iddhiyā pāramiṅgato;
suppasannattaṁ → supasannantaṁ (sya1ed, sya2ed); suppasannantaṁ (mr) Nabhaṁ abbhuggamī dhīro, haṁsarājāva ambare.

Catunnavutito kappe, yaṁ dānamadadiṁ tadā; Duggatiṁ nābhijānāmi, sappitelassidaṁ phalaṁ.

Ito sattarase kappe, jutideva sanāmako;
jutideva → dutideva (sya1ed, sya2ed); tutideva (mr) Sattaratanasampanno, cakkavattī mahabbalo.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā sappidāyako thero imā gāthāyo abhāsitthāti.

Sappidāyakattherassāpadānaṁ navamaṁ.