“Cetiyaṁ uttamaṁ nāma, sikhino lokabandhuno; Araññe irīṇe vane, andhāhiṇḍāmahaṁ tadā.

Pavanā nikkhamantena, diṭṭhaṁ sīhāsanaṁ mayā; Ekaṁsaṁ añjaliṁ katvā, santhaviṁ lokanāyakaṁ.
santhaviṁ → thavissaṁ (bj, pts-vp-pli1)

Divasabhāgaṁ thavitvāna, buddhaṁ lokagganāyakaṁ; Haṭṭho haṭṭhena cittena, imaṁ vācaṁ udīrayiṁ.

‘Namo te purisājañña, namo te purisuttama; Sabbaññūsi mahāvīra, lokajeṭṭha narāsabha’.

Abhitthavitvā sikhinaṁ, nimittakaraṇenahaṁ; Āsanaṁ abhivādetvā, pakkāmiṁ uttarāmukho.

Ekattiṁse ito kappe, yaṁ thaviṁ vadataṁ varaṁ; Duggatiṁ nābhijānāmi, thomanāya idaṁ phalaṁ.

Sattavīse ito kappe, atulā satta āsu te; Sattaratanasampannā, cakkavattī mahabbalā.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā āsanasanthaviko thero imā gāthāyo abhāsitthāti.
āsanasanthaviko → āsanatthaviko (bj, sya1ed, sya2ed, pts-vp-pli1); āsanathaviko (mr); āsanasanthavako (?)

Āsanasanthavikattherassāpadānaṁ chaṭṭhaṁ.