“Kānanaṁ vanamogayha, vasāmi luddako ahaṁ; Punnāgaṁ pupphitaṁ disvā, buddhaseṭṭhaṁ anussariṁ.

Taṁ pupphaṁ ocinitvāna, sugandhaṁ gandhitaṁ subhaṁ; Thūpaṁ katvāna puline, buddhassa abhiropayiṁ.
katvāna → karitvā (bj) | puline → puḷine (sya-all) | karitvā → katvāna (bj: machasaṁ)

Dvenavute ito kappe, yaṁ pupphamabhipūjayiṁ; Duggatiṁ nābhijānāmi, buddhapūjāyidaṁ phalaṁ.

Ekamhi navute kappe, eko āsiṁ tamonudo; Sattaratanasampanno, cakkavattī mahabbalo.
cakkavattī → cakkavatti (sya-all)

Paṭisambhidā catasso, …pe… kataṁ buddhassa sāsanaṁ”.
sāsanaṁ → sāsananti (sya-all)

Itthaṁ sudaṁ āyasmā punnāgapupphiyo thero imā gāthāyo abhāsitthāti.

Punnāgapupphiyattherassāpadānaṁ tatiyaṁ.
punnāgapupphiyattherassāpadānaṁ → punnāgapupphiyattherassa apadānaṁ (bj)