“Nagare haṁsavatiyā, ahosiṁ māliko tadā; Ogāhetvā padumasaraṁ, satapattaṁ ocināmahaṁ.

Padumuttaro nāma jino, sabbadhammāna pāragū; Saha satasahassehi, santacittehi tādibhi.
satasahassehi → satasahassasissehi (mr)

Khīṇāsavehi suddhehi, chaḷabhiññehi jhāyibhi;
jhāyibhi → so tadā (bj); so saha (pts-vp-pli1, mr) Mama vuddhiṁ samanvesaṁ, āgacchi mama santikaṁ.
mama santikaṁ → mama santike (bj); purisuttamo (sya1ed, sya2ed, pts-vp-pli1, mr)

Disvānahaṁ devadevaṁ, sayambhuṁ lokanāyakaṁ; Vaṇṭe chetvā satapattaṁ, ukkhipimambare tadā.

Yadi buddho tuvaṁ vīra, lokajeṭṭho narāsabho; Sayaṁ gantvā satapattā, matthake dhārayantu te.

Adhiṭṭhahi mahāvīro, lokajeṭṭho narāsabho; Buddhassa ānubhāvena, matthake dhārayiṁsu te.

Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ.

Tattha me sukataṁ byamhaṁ, satapattanti vuccati; Saṭṭhiyojanamubbiddhaṁ, tiṁsayojanavitthataṁ.

Sahassakkhattuṁ devindo, devarajjamakārayiṁ; Pañcasattatikkhattuñca, cakkavattī ahosahaṁ.

Padesarajjaṁ vipulaṁ, gaṇanāto asaṅkhiyaṁ; Anubhomi sakaṁ kammaṁ, pubbe sukatamattano.

Tenevekapadumena, anubhotvāna sampadā; Gotamassa bhagavato, dhammaṁ sacchikariṁ ahaṁ.

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

Satasahassito kappe, yaṁ pupphamabhipūjayiṁ; Duggatiṁ nābhijānāmi, ekapadumassidaṁ phalaṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā ukkhittapadumiyo thero imā gāthāyo abhāsitthāti.

Ukkhittapadumiyattherassāpadānaṁ dasamaṁ.

Gandhodakavaggo catutiṁsatimo.
Gandhodakavaggo → gandhadhūpiyavaggo (bj)

Tassuddānaṁ

Gandhadhūpo udakañca, punnāga ekadussakā; Phusito ca pabhaṅkaro, kuṭido uttarīyako.

Savanī ekapadumī, gāthāyo sabbapiṇḍitā; Ekaṁ gāthāsatañceva, catutālīsameva ca.