Ekapadumiyattheraapadāna
“Padumuttaro nāma jino, sabbadhammāna pāragū; Bhavābhave vibhāvento, tāresi janataṁ bahuṁ.
Haṁsarājā tadā homi, dijānaṁ pavaro ahaṁ; Jātassaraṁ samogayha, kīḷāmi haṁsakīḷitaṁ.
Padumuttaro lokavidū, āhutīnaṁ paṭiggaho; Jātassarassa upari, āgacchi tāvade jino.
Disvānahaṁ devadevaṁ, sayambhuṁ lokanāyakaṁ; Vaṇṭe chetvāna padumaṁ, satapattaṁ manoramaṁ.
Mukhatuṇḍena paggayha, pasanno lokanāyake;
pasanno lokanāyake → vippasannena cetasā (sya1ed, sya2ed) Ukkhipitvāna gagane, buddhaseṭṭhaṁ apūjayiṁ.
Ukkhipitvāna gagane → ukkhipitvā nalāṭena (mr)Padumuttaro lokavidū, āhutīnaṁ paṭiggaho; Antalikkhe ṭhito satthā, akā me anumodanaṁ.
‘Iminā ekapadumena, cetanāpaṇidhīhi ca; Kappānaṁ satasahassaṁ, vinipātaṁ na gacchasi’.
Idaṁ vatvāna sambuddho, jalajuttamanāmako; Mama kammaṁ pakittetvā, agamā yena patthitaṁ.
Satasahassito kappe, yaṁ kammamakariṁ tadā; Duggatiṁ nābhijānāmi, buddhapūjāyidaṁ phalaṁ.
Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.
Itthaṁ sudaṁ āyasmā ekapadumiyo thero imā gāthāyo abhāsitthāti.
