“Candabhāgānadītīre, ahosiṁ vānaro tadā; Addasaṁ virajaṁ buddhaṁ, nisinnaṁ pabbatantare.

Obhāsentaṁ disā sabbā, sālarājaṁva phullitaṁ; Lakkhaṇabyañjanūpetaṁ, disvā attamano ahuṁ.

Udaggacitto sumano, pītiyā haṭṭhamānaso; Tīṇi uppalapupphāni, matthake abhiropayiṁ.

Pupphāni abhiropetvā, vipassissa mahesino; Sagāravo bhavitvāna, pakkāmiṁ uttarāmukho.
bhavitvāna → gamitvāna (bj, pts-vp-pli1); namitvāna (mr)

Gacchanto paṭikuṭiko, vippasannena cetasā; Selantare patitvāna, pāpuṇiṁ jīvitakkhayaṁ.
patitvāna → papatitvā (sya1ed, sya2ed, mr)

Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ.
mānusaṁ dehaṁ → purimaṁ jātiṁ (?)

Satānaṁ tīṇikkhattuñca, devarajjaṁ akārayiṁ; Satānaṁ pañcakkhattuñca, cakkavattī ahosahaṁ.

Ekanavutito kappe, yaṁ pupphamabhipūjayiṁ; Duggatiṁ nābhijānāmi, buddhapūjāyidaṁ phalaṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā tīṇuppalamāliyo thero imā gāthāyo abhāsitthāti.
tīṇuppalamāliyo → tiuppalamāliyo (bj)

Tīṇuppalamāliyattherassāpadānaṁ dutiyaṁ.