Anotattasarāsanne, ramaṇīye silātale; Nānāratanapajjote, nānāgandhavanantare.

Mahatā bhikkhusaṅghena, pareto lokanāyako;
pareto → upeto (ud4.8:1 [Sundarīsutta] meghiyavagge sundarīsutte aṭṭhakathāyaṁ) Āsīno byākarī tattha, pubbakammāni attano.

“Suṇātha bhikkhavo mayhaṁ, yaṁ kammaṁ pakataṁ mayā; Pilotikassa kammassa, buddhattepi vipaccati.

10.1

Munāḷi nāmahaṁ dhutto, pubbe aññāsu jātisu; Paccekabuddhaṁ surabhiṁ, abbhācikkhiṁ adūsakaṁ.
surabhiṁ → sarabhuṁ (bj); surabhim (pts-vp-pli1)

Tena kammavipākena, niraye saṁsariṁ ciraṁ; Bahūvassasahassāni, dukkhaṁ vedesi vedanaṁ.

Tena kammāvasesena, idha pacchimake bhave; Abbhakkhānaṁ mayā laddhaṁ, sundarikāya kāraṇā.

10.2

Sabbābhibhussa buddhassa, nando nāmāsi sāvako; Taṁ abbhakkhāya niraye, ciraṁ saṁsaritaṁ mayā.

Dasavassasahassāni, niraye saṁsariṁ ciraṁ; Manussabhāvaṁ laddhāhaṁ, abbhakkhānaṁ bahuṁ labhiṁ.

Tena kammāvasesena, ciñcamānavikā mamaṁ; Abbhācikkhi abhūtena, janakāyassa aggato.

10.3

Brāhmaṇo sutavā āsiṁ, ahaṁ sakkatapūjito; Mahāvane pañcasate, mante vācemi māṇave.

Tatthāgato isi bhīmo, pañcābhiñño mahiddhiko;
Tatthāgato → tamāgato (mr) Tañcāhaṁ āgataṁ disvā, abbhācikkhiṁ adūsakaṁ.

Tatohaṁ avacaṁ sisse, kāmabhogī ayaṁ isi; Mayhampi bhāsamānassa, anumodiṁsu māṇavā.

Tato māṇavakā sabbe, bhikkhamānaṁ kule kule; Mahājanassa āhaṁsu, kāmabhogī ayaṁ isi.

Tena kammavipākena, pañca bhikkhusatā ime; Abbhakkhānaṁ labhuṁ sabbe, sundarikāya kāraṇā.

10.4

Vemātubhātaraṁ pubbe, dhanahetu haniṁ ahaṁ; Pakkhipiṁ giriduggasmiṁ, silāya ca apiṁsayiṁ.

Tena kammavipākena, devadatto silaṁ khipi; Aṅguṭṭhaṁ piṁsayī pāde, mama pāsāṇasakkharā.

10.5

Purehaṁ dārako hutvā, kīḷamāno mahāpathe; Paccekabuddhaṁ disvāna, magge sakalikaṁ khipiṁ.
sakalikaṁ → sakkhalikaṁ (mr) | khipiṁ → dahiṁ (sya1ed, sya2ed, pts-vp-pli1)

Tena kammavipākena, idha pacchimake bhave; Vadhatthaṁ maṁ devadatto, abhimāre payojayi.

10.6

Hatthāroho pure āsiṁ, paccekamunimuttamaṁ; Piṇḍāya vicarantaṁ taṁ, āsādesiṁ gajenahaṁ.

Tena kammavipākena, bhanto nāḷāgirī gajo;
bhanto → danto (mr) | nāḷāgirī → nālāgirī (bj) Giribbaje puravare, dāruṇo samupāgami.
samupāgami → maṁ upāgami (bj, pts-vp-pli1)

10.7

Rājāhaṁ patthivo āsiṁ, sattiyā purisaṁ haniṁ;
patthivo → pattiko (sya1ed, sya2ed, mr) Tena kammavipākena, niraye paccisaṁ bhusaṁ.

Kammuno tassa sesena, idāni sakalaṁ mama; Pāde chaviṁ pakappesi, na hi kammaṁ vinassati.
pakappesi → pakopesi (bj, pts-vp-pli1)

10.8

Ahaṁ kevaṭṭagāmasmiṁ, ahuṁ kevaṭṭadārako; Macchake ghātite disvā, janayiṁ somanassakaṁ.

Tena kammavipākena, sīsadukkhaṁ ahū mama; Sabbe sakkā ca haññiṁsu, yadā hani viṭaṭūbho.
viṭaṭūbho → viḍūḍabho (bj); viṭaṭubho (sya1ed, sya2ed); viḍuḍabho (pts-vp-pli1)

10.9

Phussassāhaṁ pāvacane, sāvake paribhāsayiṁ; Yavaṁ khādatha bhuñjatha, mā ca bhuñjatha sālayo.

Tena kammavipākena, temāsaṁ khāditaṁ yavaṁ; Nimantito brāhmaṇena, verañjāyaṁ vasiṁ tadā.

10.10

Nibbuddhe vattamānamhi, mallaputtaṁ niheṭhayiṁ;
niheṭhayiṁ → nisedhayiṁ (sya1ed, sya2ed, pts-vp-pli1, mr) Tena kammavipākena, piṭṭhidukkhaṁ ahū mama.

10.11

Tikicchako ahaṁ āsiṁ, seṭṭhiputtaṁ virecayiṁ; Tena kammavipākena, hoti pakkhandikā mama.

10.12

Avacāhaṁ jotipālo, sugataṁ kassapaṁ tadā; Kuto nu bodhi muṇḍassa, bodhi paramadullabhā.

Tena kammavipākena, acariṁ dukkaraṁ bahuṁ; Chabbassānuruvelāyaṁ, tato bodhimapāpuṇiṁ.

Nāhaṁ etena maggena, pāpuṇiṁ bodhimuttamaṁ; Kummaggena gavesissaṁ, pubbakammena vārito.

Puññapāpaparikkhīṇo, sabbasantāpavajjito; Asoko anupāyāso, nibbāyissamanāsavo”.

Evaṁ jino viyākāsi, bhikkhusaṅghassa aggato; Sabbābhiññābalappatto, anotatte mahāsareti.

Itthaṁ sudaṁ bhagavā attano pubbacaritaṁ kammapilotikaṁ nāma buddhāpadānadhammapariyāyaṁ abhāsitthāti.
kammapilotikaṁ → pubbakammapilotikaṁ (bj); pubbakammapilotiṁ (sya1ed, sya2ed); pubbakammapiloti (pts-vp-pli1)

Pubbakammapilotikaṁ nāma buddhāpadānaṁ dasamaṁ.

Avaṭaphalavaggo ekūnacattālīsamo.
Avaṭaphalavaggo → avaṇṭaphalavaggo (bj, pts-vp-pli1); ambaṭaphalavaggo (sya1ed, sya2ed)

Tassuddānaṁ

Avaṭaṁ labujañceva, udumbarapilakkhu ca; Phāru vallī ca kadalī, panaso koṭivīsako.

Pubbakammapiloti ca, apadānaṁ mahesino; Gāthāyo ekanavuti, gaṇitāyo vibhāvibhi.

Cuddasamaṁ bhāṇavāraṁ.