“Piyadassī nāma bhagavā, sayambhū lokanāyako; Vivekakāmo sambuddho, samādhikusalo muni.

Vanasaṇḍaṁ samogayha, piyadassī mahāmuni; Paṁsukūlaṁ pattharitvā, nisīdi purisuttamo.

Migaluddo pure āsiṁ, araññe kānane ahaṁ;
araññe → vipine (bj); irine (sya1ed, sya2ed, mr); iriṇe (pts-vp-pli1) Pasadaṁ migamesanto, āhiṇḍāmi ahaṁ tadā.

Tatthaddasāsiṁ sambuddhaṁ, oghatiṇṇamanāsavaṁ; Pupphitaṁ sālarājaṁva, sataraṁsiṁva uggataṁ.

Disvānahaṁ devadevaṁ, piyadassiṁ mahāyasaṁ; Jātassaraṁ samogayha, padumaṁ āhariṁ tadā.

Āharitvāna padumaṁ, satapattaṁ manoramaṁ; Kūṭāgāraṁ karitvāna, chādayiṁ padumenahaṁ.

Anukampako kāruṇiko, piyadassī mahāmuni; Sattarattindivaṁ buddho, kūṭāgāre vasī jino.

Purāṇaṁ chaḍḍayitvāna, navena chādayiṁ ahaṁ; Añjaliṁ paggahetvāna, aṭṭhāsiṁ tāvade ahaṁ.

Vuṭṭhahitvā samādhimhā, piyadassī mahāmuni; Disaṁ anuvilokento, nisīdi lokanāyako.

Tadā sudassano nāma, upaṭṭhāko mahiddhiko; Cittamaññāya buddhassa, piyadassissa satthuno.

Asītiyā sahassehi, bhikkhūhi parivārito; Vanante sukhamāsīnaṁ, upesi lokanāyakaṁ.

Yāvatā vanasaṇḍamhi, adhivatthā ca devatā; Buddhassa cittamaññāya, sabbe sannipatuṁ tadā.

Samāgatesu yakkhesu, kumbhaṇḍe saharakkhase; Bhikkhusaṅghe ca sampatte, gāthā pabyāharī jino.
gāthā pabyāharī → gāthā'mā vyāharī (bj); gāthā sabyāharī (sya1ed, sya2ed); gāthā mavyāhārī (pts-vp-pli1)

‘Yo maṁ sattāhaṁ pūjesi, āvāsañca akāsi me; Tamahaṁ kittayissāmi, suṇātha mama bhāsato.

Sududdasaṁ sunipuṇaṁ, gambhīraṁ suppakāsitaṁ; Ñāṇena kittayissāmi, suṇātha mama bhāsato.

Catuddasāni kappāni, devarajjaṁ karissati; Kūṭāgāraṁ mahantassa, padmapupphehi chāditaṁ.
mahantassa → brahaṁ tassa (bj); brahantassa (sya1ed, sya2ed, pts-vp-pli1)

Ākāse dhārayissati, pupphakammassidaṁ phalaṁ;
pupphakammassidaṁ → pubbakammassidaṁ (sya1ed, sya2ed, pts-vp-pli1) Catubbīse kappasate, vokiṇṇaṁ saṁsarissati.
Catubbīse → catuddase (sya1ed, sya2ed); catubbise (pts-vp-pli1)

Tattha pupphamayaṁ byamhaṁ, ākāse dhārayissati; Yathā padumapattamhi, toyaṁ na upalimpati.

Tathevīmassa ñāṇamhi, kilesā nopalimpare; Manasā vinivaṭṭetvā, pañca nīvaraṇe ayaṁ.

Cittaṁ janetvā nekkhamme, agārā pabbajissati; Tato pupphamaye byamhe, dhārente nikkhamissati.
dhārente → dhārentaṁ (sya1ed, sya2ed, pts-vp-pli1, mr)

Rukkhamūle vasantassa, nipakassa satīmato; Tattha pupphamayaṁ byamhaṁ, matthake dhārayissati.

Cīvaraṁ piṇḍapātañca, paccayaṁ sayanāsanaṁ; Datvāna bhikkhusaṅghassa, nibbāyissatināsavo’.

Kūṭāgārena caratā, pabbajjaṁ abhinikkhamiṁ;
caratā → caraṇā (si, pts-vp-pli1, mr); carite (sya1ed, sya2ed) Rukkhamūle vasantampi, kūṭāgāraṁ dharīyati.
vasantampi → vasantamhi (bj); vasatopi (?)

Cīvare piṇḍapāte ca, cetanā me na vijjati; Puññakammena saṁyutto, labhāmi pariniṭṭhitaṁ.

Gaṇanāto asaṅkheyyā, kappakoṭī bahū mama; Rittakā te atikkantā, pamuttā lokanāyakā.

Aṭṭhārase kappasate, piyadassī vināyako; Tamahaṁ payirupāsitvā, imaṁ yoniṁ upāgato.

Idha passāmi sambuddhaṁ, anomaṁ nāma cakkhumaṁ;
Idha passāmi → idhaddasāsiṁ (bj); tamaddasāmi (sya1ed, sya2ed); tamaddassāsiṁ (pts-vp-pli1) Tamahaṁ upagantvāna, pabbajiṁ anagāriyaṁ.

Dukkhassantakaro buddho, maggaṁ me desayī jino; Tassa dhammaṁ suṇitvāna, pattomhi acalaṁ padaṁ.

Tosayitvāna sambuddhaṁ, gotamaṁ sakyapuṅgavaṁ; Sabbāsave pariññāya, viharāmi anāsavo.

Aṭṭhārase kappasate, yaṁ buddhamabhipūjayiṁ; Duggatiṁ nābhijānāmi, buddhapūjāyidaṁ phalaṁ.

Kilesā jhāpitā mayhaṁ, bhavā sabbe samūhatā; Sabbāsavā parikkhīṇā, natthi dāni punabbhavo.

Svāgataṁ vata me āsi, …pe… kataṁ buddhassa sāsanaṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā padumakūṭāgāriyo thero imā gāthāyo abhāsitthāti.
padumakūṭāgāriyo → padumakūṭāgāriko (sya1ed, sya2ed)

Padumakūṭāgāriyattherassāpadānaṁ pañcamaṁ.