“Imamhi bhaddake kappe, brahmabandhu mahāyaso; Kassapo nāma gottena, uppajji vadataṁ varo.

Nippapañco nirālambo, ākāsasamamānaso; Suññatābahulo tādī, animittarato vasī.

Asaṅgacitto nikleso, asaṁsaṭṭho kule gaṇe;
nikleso → nillepo (sya1ed, sya2ed, mr) Mahākāruṇiko vīro, vinayopāyakovido.

Uyyutto parakiccesu, vinayanto sadevake; Nibbānagamanaṁ maggaṁ, gatiṁ paṅkavisosanaṁ.

Amataṁ paramassādaṁ, jarāmaccunivāraṇaṁ; Mahāparisamajjhe so, nisinno lokatārako.

Karavīkaruto nātho, brahmaghoso tathāgato;
Karavīkaruto → karavikarudo (sya1ed, sya2ed); karavīkarudo (pts-vp-pli1, mr) Uddharanto mahāduggā, vippanaṭṭhe anāyake.

Desento virajaṁ dhammaṁ, diṭṭho me lokanāyako; Tassa dhammaṁ suṇitvāna, pabbajiṁ anagāriyaṁ.

Pabbajitvā tadāpāhaṁ, cintento jinasāsanaṁ; Ekakova vane ramme, vasiṁ saṁsaggapīḷito.

Sakkāyavūpakāso me, hetubhūto mamābhavī;
mamābhavī → mahābhavi (bj); mamāgami (sya1ed, sya2ed, pts-vp-pli1) Manaso vūpakāsassa, saṁsaggabhayadassino.

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā ekavihāriko thero imā gāthāyo abhāsitthāti.
ekavihāriko → ekavihāriyo (bj, sya1ed, sya2ed, pts-vp-pli1)

Ekavihārikattherassāpadānaṁ paṭhamaṁ.