“Suvaṇṇavaṇṇaṁ sambuddhaṁ, āhutīnaṁ paṭiggahaṁ; Vipinaggena gacchantaṁ, addasaṁ lokanāyakaṁ.

Naḷamālaṁ gahetvāna, nikkhamanto ca tāvade; Tatthaddasāsiṁ sambuddhaṁ, oghatiṇṇamanāsavaṁ.

Pasannacitto sumano, naḷamālamapūjayiṁ; Dakkhiṇeyyaṁ mahāvīraṁ, sabbalokānukampakaṁ.

Ekatiṁse ito kappe, yaṁ mālamabhiropayiṁ;
mālamabhiropayiṁ → pupphamabhiropayiṁ (bj, pts-vp-pli1); pupphaṁ abhiropayiṁ (sya1ed, sya2ed) Duggatiṁ nābhijānāmi, buddhapūjāyidaṁ phalaṁ.

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā naḷamāliyo thero imā gāthāyo abhāsitthāti.

Naḷamāliyattherassāpadānaṁ paṭhamaṁ.