“Padumuttarassa bhagavato, lokajeṭṭhassa tādino; Nibbute lokanāthamhi, pūjaṁ kubbanti satthuno.

Udaggacittā janatā, āmoditapamoditā; Tesu saṁvegajātesu, pīti me udapajjatha.

Ñātimitte samānetvā, idaṁ vacanamabraviṁ; Parinibbuto mahāvīro, handa pūjaṁ karomase.

Sādhūti te paṭissutvā, bhiyyo hāsaṁ janiṁsu me; Buddhasmiṁ lokanāthamhi, kāhāma puññasañcayaṁ.

Agghiyaṁ sukataṁ katvā, satahatthasamuggataṁ; Diyaḍḍhahatthapatthaṭaṁ, vimānaṁ nabhamuggataṁ.

Katvāna hammiyaṁ tattha, tālapantīhi cittitaṁ; Sakaṁ cittaṁ pasādetvā, cetiyaṁ pūjayuttamaṁ.

Aggikkhandhova jalito, kiṁsuko iva phullito;
iva → sālarājāva (bj, sya1ed, sya2ed, pts-vp-pli1); kiṁsuko viya (si) Indalaṭṭhīva ākāse, obhāsati catuddisā.

Tattha cittaṁ pasādetvā, katvāna kusalaṁ bahuṁ; Pubbakammaṁ saritvāna, tidasaṁ upapajjahaṁ.
dasa → disodisaṁ (sya1ed, sya2ed)

Sahassayuttaṁ hayavāhiṁ, dibbayānamadhiṭṭhito; Ubbiddhaṁ bhavanaṁ mayhaṁ, sattabhūmaṁ samuggataṁ.

Kūṭāgārasahassāni, sabbasoṇṇamayā ahuṁ; Jalanti sakatejena, disā sabbā pabhāsayaṁ.

Santi aññepi niyyūhā, lohitaṅgamayā tadā; Tepi jotanti ābhāya, samantā caturo disā.

Puññakammābhinibbattā, kūṭāgārā sunimmitā; Maṇimayāpi jotanti, disā dasa samantato.

Tesaṁ ujjotamānānaṁ, obhāso vipulo ahu; Sabbe deve abhibhomi, puññakammassidaṁ phalaṁ.

Saṭṭhikappasahassamhi, ubbiddho nāma khattiyo; Cāturanto vijitāvī, pathaviṁ āvasiṁ ahaṁ.

Tatheva bhaddake kappe, tiṁsakkhattuṁ ahosahaṁ; Sakakammābhiraddhomhi, cakkavattī mahabbalo.

Sattaratanasampanno, catudīpamhi issaro; Tatthāpi bhavanaṁ mayhaṁ, indalaṭṭhīva uggataṁ.

Āyāmato catubbīsaṁ, vitthārena ca dvādasa; Rammaṇaṁ nāma nagaraṁ, daḷhapākāratoraṇaṁ.
Rammaṇaṁ → rammakaṁ (bj, sya1ed, sya2ed, pts-vp-pli1)

Āyāmato pañcasataṁ, vitthārena tadaḍḍhakaṁ; Ākiṇṇaṁ janakāyehi, tidasānaṁ puraṁ viya.

Yathā sūcighare sūcī, pakkhittā paṇṇavīsati; Aññamaññaṁ paghaṭṭenti, ākiṇṇaṁ hoti laṅkataṁ.
laṅkataṁ → taṁ tadā (bj, pts-vp-pli1); satatā (sya1ed, sya2ed); saṅkaraṁ (?)

Evampi nagaraṁ mayhaṁ, hatthissarathasaṅkulaṁ; Manussehi sadākiṇṇaṁ, rammaṇaṁ nagaruttamaṁ.

Tattha bhutvā pivitvā ca, puna devattanaṁ gato;
puna devattanaṁ gato → puna devattataṁ gato (sya1ed, sya2ed, pts-vp-pli1); punapi devataṅgato (mr) Bhave pacchimake mayhaṁ, ahosi kulasampadā.

Brāhmaññakulasambhūto, mahāratanasañcayo; Asītikoṭiyo hitvā, hiraññassāpi pabbajiṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā mahākassapo thero imā gāthāyo abhāsitthāti.

Mahākassapattherassāpadānaṁ tatiyaṁ.