“Siddhatthassa bhagavato, lokajeṭṭhassa tādino; Agghiyaṁ kārayitvāna, jātipupphehi chādayiṁ.

Niṭṭhāpetvāna taṁ pupphaṁ, buddhassa upanāmayiṁ; Pupphāvasesaṁ paggayha, buddhassa abhiropayiṁ.

Kañcanagghiyasaṅkāsaṁ, buddhaṁ lokagganāyakaṁ; Pasannacitto sumano, pupphagghiyamupānayiṁ.

Vitiṇṇakaṅkho sambuddho, tiṇṇoghehi purakkhato; Bhikkhusaṅghe nisīditvā, imā gāthā abhāsatha.

‘Dibbagandhaṁ pavāyantaṁ, yo me pupphagghiyaṁ adā; Tamahaṁ kittayissāmi, suṇātha mama bhāsato.

Ito cuto ayaṁ poso, devasaṅghapurakkhato; Jātipupphehi parikiṇṇo, devalokaṁ gamissati.

Ubbiddhaṁ bhavanaṁ tassa, sovaṇṇañca maṇīmayaṁ; Byamhaṁ pātubhavissati, puññakammappabhāvitaṁ.

Catusattatikkhattuṁ so, devarajjaṁ karissati; Anubhossati sampattiṁ, accharāhi purakkhato.

Pathabyā rajjaṁ tisataṁ, vasudhaṁ āvasissati; Pañcasattatikkhattuñca, cakkavattī bhavissati.

Dujjayo nāma nāmena, hessati manujādhipo; Anubhotvāna taṁ puññaṁ, sakakammaṁ apassito.
sakakammaṁ apassito → sakakammūpasaṁhito (sya1ed, sya2ed)

Vinipātaṁ agantvāna, manussattaṁ gamissati; Hiraññaṁ tassa nicitaṁ, koṭisatamanappakaṁ.
Hiraññaṁ tassa → hiraññassa ca (bj, pts-vp-pli1, mr)

Nibbattissati yonimhi, brāhmaṇe so bhavissati; Vaṅgantassa suto dhīmā, sāriyā oraso piyo.

So ca pacchā pabbajitvā, aṅgīrasassa sāsane; Cūḷacundoti nāmena, hessati satthu sāvako.
Cūḷacundoti → cūlacundoti (bj, pts-vp-pli1)

Sāmaṇerova so santo, khīṇāsavo bhavissati; Sabbāsave pariññāya, nibbāyissatināsavo’.

Upaṭṭhahiṁ mahāvīraṁ, aññe ca pesale bahū; Bhātaraṁ me cupaṭṭhāsiṁ, uttamatthassa pattiyā.

Bhātaraṁ me upaṭṭhitvā, dhātuṁ pattamhi ohiya;
ohiya → opiya (bj, pts-vp-pli1); ociya (sya1ed, sya2ed) Sambuddhaṁ upanāmesiṁ, lokajeṭṭhaṁ narāsabhaṁ.

Ubho hatthehi paggayha, buddho loke sadevake; Sandassayanto taṁ dhātuṁ, kittayi aggasāvakaṁ.

Cittañca suvimuttaṁ me, saddhā mayhaṁ patiṭṭhitā; Sabbāsave pariññāya, viharāmi anāsavo.

Paṭisambhidānuppattā, vimokkhāpi ca phassitā;
vimokkhāpi ca phassitā → vimokkhāpica aṭṭhime (sya1ed, sya2ed, pts-vp-pli1) Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā cundo thero imā gāthāyo abhāsitthāti.

Cundattherassāpadānaṁ dasamaṁ.

Upālivaggo pañcamo.

Tassuddānaṁ

Upāli soṇo bhaddiyo, sanniṭṭhāpakahatthiyo; Chadanaṁ seyyacaṅkamaṁ, subhaddo cundasavhayo; Gāthāsataṁ satālīsaṁ, catasso ca taduttari.
satālīsaṁ → ca tāḷīsaṁ (bj, sya1ed, sya2ed); ca tālīsaṁ (pts-vp-pli1)