Dabbamallaputtattheraapadāna
“Padumuttaro nāma jino, sabbalokavidū muni; Ito satasahassamhi, kappe uppajji cakkhumā.
Ovādako viññāpako, tārako sabbapāṇinaṁ; Desanākusalo buddho, tāresi janataṁ bahuṁ.
Anukampako kāruṇiko, hitesī sabbapāṇinaṁ; Sampatte titthiye sabbe, pañcasīle patiṭṭhapi.
patiṭṭhapi → patiṭṭhahi (sya1ed, sya2ed, mr)Evaṁ nirākulaṁ āsi, suññataṁ titthiyehi ca; Vicittaṁ arahantehi, vasībhūtehi tādibhi.
Ratanānaṭṭhapaññāsaṁ, uggato so mahāmuni; Kañcanagghiyasaṅkāso, bāttiṁsavaralakkhaṇo.
Vassasatasahassāni, āyu vijjati tāvade; Tāvatā tiṭṭhamāno so, tāresi janataṁ bahuṁ.
Tadāhaṁ haṁsavatiyaṁ, seṭṭhiputto mahāyaso; Upetvā lokapajjotaṁ, assosiṁ dhammadesanaṁ.
Senāsanāni bhikkhūnaṁ, paññāpentaṁ sasāvakaṁ; Kittayantassa vacanaṁ, suṇitvā mudito ahaṁ.
Adhikāraṁ sasaṅghassa, katvā tassa mahesino; Nipacca sirasā pāde, taṁ ṭhānamabhipatthayiṁ.
Tadāha sa mahāvīro, mama kammaṁ pakittayaṁ; ‘Yo sasaṅghamabhojesi, sattāhaṁ lokanāyakaṁ.
Soyaṁ kamalapattakkho, sīhaṁso kanakattaco; Mama pādamūle nipati, patthayaṁ ṭhānamuttamaṁ.
nipati → patito (pts-vp-pli1)Satasahassito kappe, okkākakulasambhavo; Gotamo nāma gottena, satthā loke bhavissati.
Sāvako tassa buddhassa, dabbo nāmena vissuto; Senāsanapaññāpako, aggo hessatiyaṁ tadā’.
Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ.
Satānaṁ tīṇikkhattuñca, devarajjamakārayiṁ; Satānaṁ pañcakkhattuñca, cakkavattī ahosahaṁ.
Padesarajjaṁ vipulaṁ, gaṇanāto asaṅkhiyaṁ; Sabbattha sukhito āsiṁ, tassa kammassa vāhasā.
Ekanavutito kappe, vipassī nāma nāyako; Uppajji cārudassano, sabbadhammavipassako.
cārudassano → cārunayano (bj, sya1ed, sya2ed, pts-vp-pli1)Duṭṭhacitto upavadiṁ, sāvakaṁ tassa tādino; Sabbāsavaparikkhīṇaṁ, suddhoti ca vijāniya.
Tasseva naravīrassa, sāvakānaṁ mahesinaṁ; Salākañca gahetvāna, khīrodanamadāsahaṁ.
Salākañca gahetvāna → salākaṁ paggahetvāna (bj, pts-vp-pli1)Imamhi bhaddake kappe, brahmabandhu mahāyaso; Kassapo nāma gottena, uppajji vadataṁ varo.
Sāsanaṁ jotayitvāna, abhibhuyya kutitthiye; Vineyye vinayitvāva, nibbuto so sasāvako.
Sasisse nibbute nāthe, atthamentamhi sāsane; Devā kandiṁsu saṁviggā, muttakesā rudammukhā.
‘Nibbāyissati dhammakkho, na passissāma subbate; Na suṇissāma saddhammaṁ, aho no appapuññatā’.
Tadāyaṁ pathavī sabbā, acalā sā calācalā;
calācalā → calācalī (bj); pulāpulī (sya1ed, sya2ed) Sāgaro ca sasokova, vinadī karuṇaṁ giraṁ.Catuddisā dundubhiyo, nādayiṁsu amānusā; Samantato asaniyo, phaliṁsu ca bhayāvahā.
Ukkā patiṁsu nabhasā, dhūmaketu ca dissati; Sadhūmā jālavaṭṭā ca, raviṁsu karuṇaṁ migā.
Sadhūmā jālavaṭṭā ca → sabbatthalajasattā ca (bj); sabbathalajasattā ca (pts-vp-pli1)Uppāde dāruṇe disvā, sāsanatthaṅgasūcake; Saṁviggā bhikkhavo satta, cintayimha mayaṁ tadā.
‘Sāsanena vināmhākaṁ, jīvitena alaṁ mayaṁ; Pavisitvā mahāraññaṁ, yuñjāma jinasāsanaṁ’.
Addasamha tadāraññe, ubbiddhaṁ selamuttamaṁ; Nisseṇiyā tamāruyha, nisseṇiṁ pātayimhase.
Tadā ovadi no thero, ‘buddhuppādo sudullabho; Saddhātidullabhā laddhā, thokaṁ sesañca sāsanaṁ.
Nipatanti khaṇātītā, anante dukkhasāgare; Tasmā payogo kattabbo, yāva ṭhāti mune mataṁ’.
yāva ṭhāti mune mataṁ → yāva tiṭṭhati sāsanaṁ (sya1ed, sya2ed)Arahā āsi so thero, anāgāmī tadānugo; Susīlā itare yuttā, devalokaṁ agamhase.
Nibbuto tiṇṇasaṁsāro, suddhāvāse ca ekako; Ahañca pakkusāti ca, sabhiyo bāhiyo tathā.
Kumārakassapo ceva, tattha tatthūpagā mayaṁ; Saṁsārabandhanā muttā, gotamenānukampitā.
Mallesu kusinārāyaṁ, jāto gabbheva me sato; Mātā matā citāruḷhā, tato nippatito ahaṁ.
Patito dabbapuñjamhi, tato dabboti vissuto; Brahmacārībalenāhaṁ, vimutto sattavassiko.
Khīrodanabalenāhaṁ, pañcahaṅgehupāgato; Khīṇāsavopavādena, pāpehi bahucodito.
Ubho puññañca pāpañca, vītivattomhi dānihaṁ; Patvāna paramaṁ santiṁ, viharāmi anāsavo.
Senāsanaṁ paññāpayiṁ, hāsayitvāna subbate; Jino tasmiṁ guṇe tuṭṭho, etadagge ṭhapesi maṁ.
Kilesā jhāpitā mayhaṁ, …pe… viharāmi anāsavo.
Itthaṁ sudaṁ āyasmā dabbamallaputto thero imā gāthāyo abhāsitthāti.
