1 Lakuṇḍabhaddiyattheraapadāna
“Padumuttaro nāma jino, sabbadhammesu cakkhumā; Ito satasahassamhi, kappe uppajji nāyako.
Tadāhaṁ haṁsavatiyaṁ, seṭṭhiputto mahaddhano; Jaṅghāvihāraṁ vicaraṁ, saṅghārāmaṁ agacchahaṁ.
Tadā so lokapajjoto, dhammaṁ desesi nāyako; Mañjussarānaṁ pavaraṁ, sāvakaṁ abhikittayi.
Taṁ sutvā mudito hutvā, kāraṁ katvā mahesino; Vanditvā satthuno pāde, taṁ ṭhānamabhipatthayiṁ.
Tadā buddho viyākāsi, saṅghamajjhe vināyako; ‘Anāgatamhi addhāne, lacchase taṁ manorathaṁ.
Satasahassito kappe, okkākakulasambhavo; Gotamo nāma gottena, satthā loke bhavissati.
Tassa dhammesu dāyādo, oraso dhammanimmito; Bhaddiyo nāma nāmena, hessati satthu sāvako’.
Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ.
Dvenavute ito kappe, phusso uppajji nāyako; Durāsado duppasaho, sabbalokuttamo jino.
Caraṇena ca sampanno, brahā uju patāpavā; Hitesī sabbasattānaṁ, bahuṁ mocesi bandhanā.
sabbasattānaṁ → sabbapāṇīnaṁ (bj)Nandārāmavane tassa, ahosiṁ phussakokilo;
phussakokilo → pussakokilo (sya1ed, sya2ed) Gandhakuṭisamāsanne, ambarukkhe vasāmahaṁ.Tadā piṇḍāya gacchantaṁ, dakkhiṇeyyaṁ jinuttamaṁ; Disvā cittaṁ pasādetvā, mañjunābhinikūjahaṁ.
mañjunābhinikūjahaṁ → mañjunādena kūjahaṁ (bj); mañjunā abhikūjahaṁ (sya1ed, sya2ed, pts-vp-pli1)Rājuyyānaṁ tadā gantvā, supakkaṁ kanakattacaṁ; Ambapiṇḍaṁ gahetvāna, sambuddhassopanāmayiṁ.
Tadā me cittamaññāya, mahākāruṇiko jino; Upaṭṭhākassa hatthato, pattaṁ paggaṇhi nāyako.
Adāsiṁ haṭṭhacittohaṁ, ambapiṇḍaṁ mahāmune;
haṭṭhacittohaṁ → tuṭṭhacittohaṁ (bj) Patte pakkhippa pakkhehi, pañjaliṁ katvāna mañjunā.
pañjaliṁ → pakkhehañjaliṁ (bj)Sarena rajanīyena, savanīyena vaggunā; Vassanto buddhapūjatthaṁ, nīḷaṁ gantvā nipajjahaṁ.
nīḷaṁ → niḷaṁ (bj); niddaṁ (sya1ed, sya2ed, pts-vp-pli1)Tadā muditacittaṁ maṁ, buddhapemagatāsayaṁ; Sakuṇagghi upāgantvā, ghātayī duṭṭhamānaso.
Tato cutohaṁ tusite, anubhotvā mahāsukhaṁ; Manussayonimāgacchiṁ, tassa kammassa vāhasā.
Imamhi bhaddake kappe, brahmabandhu mahāyaso; Kassapo nāma gottena, uppajji vadataṁ varo.
Sāsanaṁ jotayitvā so, abhibhuyya kutitthiye; Vinayitvāna veneyye, nibbuto so sasāvako.
Nibbute tamhi lokagge, pasannā janatā bahū; Pūjanatthāya buddhassa, thūpaṁ kubbanti satthuno.
‘Sattayojanikaṁ thūpaṁ, sattaratanabhūsitaṁ; Karissāma mahesissa’, iccevaṁ mantayanti te.
Kikino kāsirājassa, tadā senāya nāyako; Hutvāhaṁ appamāṇassa, pamāṇaṁ cetiye vadiṁ.
Tadā te mama vākyena, cetiyaṁ yojanuggataṁ; Akaṁsu naravīrassa, nānāratanabhūsitaṁ.
Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ.
Pacchime ca bhave dāni, jāto seṭṭhikule ahaṁ; Sāvatthiyaṁ puravare, iddhe phīte mahaddhane.
Purappavese sugataṁ, disvā vimhitamānaso; Pabbajitvāna na ciraṁ, arahattamapāpuṇiṁ.
Cetiyassa pamāṇaṁ yaṁ, akariṁ tena kammunā; Lakuṇḍakasarīrohaṁ, jāto paribhavāraho.
Lakuṇḍakasarīrohaṁ → lakuṇṭakasarīrohaṁ (bj, sya1ed, sya2ed, pts-vp-pli1)Sarena madhurenāhaṁ, pūjitvā isisattamaṁ; Mañjussarānaṁ bhikkhūnaṁ, aggattamanupāpuṇiṁ.
Phaladānena buddhassa, guṇānussaraṇena ca; Sāmaññaphalasampanno, viharāmi anāsavo.
Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.
Svāgataṁ vata me āsi, buddhaseṭṭhassa santike; Tisso vijjā anuppattā, kataṁ buddhassa sāsanaṁ.
Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.
Itthaṁ sudaṁ āyasmā lakuṇḍabhaddiyo thero imā gāthāyo abhāsitthāti.
lakuṇḍabhaddiyo → lakuṇṭakabhaddiyo (bj, sya1ed, sya2ed, pts-vp-pli1)
