“Padumuttaro nāma jino, sabbadhammāna pāragū; Danto dantaparivuto, nagarā nikkhamī tadā.

Nagare haṁsavatiyaṁ, ahosiṁ māliko tadā; Yaṁ tattha uttamaṁ tīṇi, padmapupphāni aggahiṁ.
padmapupphāni → tīṇi pupphāni (bj, pts-vp-pli1); padumapupphāni (sya1ed, sya2ed)

‘Addasaṁ virajaṁ buddhaṁ, paṭimaggantarāpaṇe; Saha disvāna sambuddhaṁ, evaṁ cintesahaṁ tadā.
Saha → sohaṁ (bj, pts-vp-pli1)

Kiṁ me imehi pupphehi, rañño upanitehi me; Gāmaṁ vā gāmakhettaṁ vā, sahassaṁ vā labheyyahaṁ.

Adantadamanaṁ vīraṁ, sabbasattasukhāvahaṁ; Lokanāthaṁ pūjayitvā, lacchāmi amataṁ dhanaṁ’.

Evāhaṁ cintayitvāna, sakaṁ cittaṁ pasādayiṁ; Tīṇi lohitake gayha, ākāse ukkhipiṁ tadā.

Mayā ukkhittamattamhi, ākāse patthariṁsu te; Dhāriṁsu matthake tattha, uddhaṁvaṇṭā adhomukhā.

Ye keci manujā disvā, ukkuṭṭhiṁ sampavattayuṁ; Devatā antalikkhamhi, sādhukāraṁ pavattayuṁ.

Accheraṁ loke uppannaṁ, buddhaseṭṭhassa vāhasā; Sabbe dhammaṁ suṇissāma, pupphānaṁ vāhasā mayaṁ.

Padumuttaro lokavidū, āhutīnaṁ paṭiggaho; Vīthiyañhi ṭhito santo, imā gāthā abhāsatha.

‘Yo so buddhaṁ apūjesi, rattapadmehi māṇavo;
rattapadmehi → rattapadumehi (si, sya1ed, sya2ed, pts-vp-pli1) Tamahaṁ kittayissāmi, suṇātha mama bhāsato.

Tiṁsakappasahassāni, devaloke ramissati; Tiṁsakappāni devindo, devarajjaṁ karissati.
Tiṁsakappāni → tiṁsakkhattuñca (sya1ed, sya2ed)

Mahāvitthārikaṁ nāma, byamhaṁ hessati tāvade; Tiyojanasatubbiddhaṁ, diyaḍḍhasatavitthataṁ.

Cattārisatasahassāni, niyyūhā ca sumāpitā; Kūṭāgāravarūpetā, mahāsayanamaṇḍitā.

Koṭisatasahassiyo, parivāressanti accharā; Kusalā naccagītassa, vāditepi padakkhiṇā.

Etādise byamhavare, nārīgaṇasamākule; Vassissati pupphavasso, dibbo lohitako sadā.
dibbo → pada (mr)

Bhittikhīle nāgadante, dvārabāhāya toraṇe; Cakkamattā lohitakā, olambissanti tāvade.

Pattena pattasañchanne, antobyamhavare imaṁ; Attharitvā pārupitvā, tuvaṭṭissanti tāvade.

Bhavanaṁ parivāretvā, samantā satayojane; Tepi padmā lohitakā, dibbagandhaṁ pavāyare.
Tepi padmā → te visuddhā (bj, sya1ed, sya2ed, pts-vp-pli1)

Pañcasattatikkhattuñca, cakkavattī bhavissati; Padesarajjaṁ vipulaṁ, gaṇanāto asaṅkhiyaṁ.

Sampattiyo duve bhutvā, anīti anupaddavo; Sampatte pariyosāne, nibbānaṁ pāpuṇissati’.
nibbānaṁ → nibbāṇaṁ (bj) | pāpuṇissati → phassayissati (bj); passayissati (pts-vp-pli1, mr)

Sudiṭṭho vata me buddho, vāṇijjaṁ supayojitaṁ; Padmāni tīṇi pūjetvā, anubhosiṁ tisampadā.
anubhosiṁ tisampadā → anubhosiṁ tisampadaṁ (bj); anubhosin ti sampadā (pts-vp-pli1); anubhūyanti sampadā (mr)

Ajja me dhammappattassa, vippamuttassa sabbaso; Supupphitaṁ lohitakaṁ, dhārayissati matthake.

Mama kammaṁ kathentassa, padumuttarasatthuno; Satapāṇasahassānaṁ, dhammābhisamayo ahu.

Satasahassito kappe, yaṁ buddhamabhipūjayiṁ; Duggatiṁ nābhijānāmi, tipadumānidaṁ phalaṁ.

Kilesā jhāpitā mayhaṁ, bhavā sabbe samūhatā; Sabbāsavā parikkhīṇā, natthi dāni punabbhavo.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā tipadumiyo thero imā gāthāyo abhāsitthāti.
tipadumiyo → tīṇipadumiyo (sya1ed, sya2ed, pts-vp-pli1)

Tipadumiyattherassāpadānaṁ dasamaṁ.

Nāgasamālavaggo aṭṭhamo.

Tassuddānaṁ

Nāgasamālo padasaññī, saññakāluvadāyako; Ekasaññī tiṇasanthāro, sūcipāṭalipupphiyo; Ṭhitañjalī tipadumī, gāthāyo pañcasattati.