“Pokkharavanaṁ paviṭṭho, bhañjanto padumānihaṁ; Tatthaddasaṁ phussaṁ buddhaṁ, bāttiṁsavaralakkhaṇaṁ.
Tatthaddasaṁ phussaṁ buddhaṁ → addasaṁ phussasambuddhaṁ (bj, sya1ed, sya2ed, pts-vp-pli1)

Padumapupphaṁ gahetvāna, ākāse ukkhipiṁ ahaṁ; Pāpakammaṁ saritvāna, pabbajiṁ anagāriyaṁ.

Pabbajitvāna kāyena, manasā saṁvutena ca; Vacīduccaritaṁ hitvā, ājīvaṁ parisodhayiṁ.

Dvenavute ito kappe, yaṁ pupphamabhiropayiṁ; Duggatiṁ nābhijānāmi, buddhapūjāyidaṁ phalaṁ.

Padumābhāsanāmā ca, aṭṭhārasa mahīpatī; Aṭṭhārasesu kappesu, aṭṭhatālīsamāsisuṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā padumapupphiyo thero imā gāthāyo abhāsitthāti.

Padumapupphiyattherassāpadānaṁ dasamaṁ.

Timiravaggo navamo.
Timiravaggo → timirapupphiyavaggo (bj, sya1ed, sya2ed, pts-vp-pli1)

Tassuddānaṁ

Timiranaṅgalīpuppha, nippannañjaliko adho; Dve raṁsisaññī phalado, saddasaññī ca secako; Padmapupphī ca gāthāyo, chappaññāsa pakittitā.