“Candabhāgānadītīre, ahosiṁ kinnarī tadā; Addasaṁ virajaṁ buddhaṁ, sayambhuṁ aparājitaṁ.

Pasannacittā sumanā, vedajātā katañjalī; Naḷamālaṁ gahetvāna, sayambhuṁ abhipūjayiṁ.
Naḷamālaṁ → nalamālaṁ (pts-vp-pli1); jālamālaṁ (thig3.4:1 [Dantikātherīgāthā])

Tena kammena sukatena, cetanāpaṇidhīhi ca; Jahitvā kinnarīdehaṁ, tāvatiṁsamagacchahaṁ.
kinnarīdehaṁ → mānuyaṁ dehaṁ (si, mr); mānusaṁ dehaṁ (pts-vp-pli1)

Chattiṁsadevarājūnaṁ, mahesittamakārayiṁ; Manasā patthitaṁ mayhaṁ, nibbattati yathicchitaṁ.

Dasannaṁ cakkavattīnaṁ, mahesittamakārayiṁ; Ocitattāva hutvāna, saṁsarāmi bhavesvahaṁ.
Ocitattāva → sucitattāva (pts-vp-pli1)

Kusalaṁ vijjate mayhaṁ, pabbajiṁ anagāriyaṁ; Pūjārahā ahaṁ ajja, sakyaputtassa sāsane.

Visuddhamanasā ajja, apetamanapāpikā; Sabbāsavā parikkhīṇā, natthi dāni punabbhavo.
Sabbāsavā parikkhīṇā → sabbāsavaparikkhīṇā (sya1ed, sya2ed, csp1ed)

Catunnavutito kappe, yaṁ buddhamabhipūjayiṁ; Duggatiṁ nābhijānāmi, naḷamālāyidaṁ phalaṁ.
naḷamālāyidaṁ → sālamālāyidaṁ (bj); nalamālānidaṁ (pts-vp-pli1)

Kilesā jhāpitā mayhaṁ, …pe… viharāmi anāsavā.

Svāgataṁ vata me āsi, …pe… kataṁ buddhassa sāsanaṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ naḷamālikā bhikkhunī imā gāthāyo abhāsitthāti.
naḷamālikā → sālamālikā (bj); nalamālikā (pts-vp-pli1)

Naḷamālikātheriyāpadānaṁ chaṭṭhaṁ.