“Bhavā sabbe parikkhīṇā, bhavā santi vimocitā; Sabbāsavā ca no natthi, ārocema mahāmune.

Purimaṁ kusalaṁ kammaṁ, yaṁ kiñci sādhupatthitaṁ;
Purimaṁ kusalaṁ kammaṁ → parikammañca kusalaṁ (sya1ed, sya2ed); purimaṁ kammaṁ kusalaṁ (pts-vp-pli1) Paribhogamayaṁ dinnaṁ, tuyhatthāya mahāmune.

Buddhapaccekabuddhānaṁ, sāvakānañca patthitaṁ;
sāvakānañca patthitaṁ → buddhānaṁ sāvakānañca (bj, mr) Paribhogamayaṁ dinnaṁ, tuyhatthāya mahāmune.

Uccanīcamayaṁ kammaṁ, bhikkhūnaṁ sādhupatthitaṁ; Uccākulaparikammaṁ, katametaṁ mahāmune.
katametaṁ mahāmune → katamhehi mahāmune (sya1ed, sya2ed, pts-vp-pli1)

Teneva sukkamūlena, coditā kammasampadā; Mānusikamatikkantā, jāyiṁsu khattiye kule.

Uppatte ca kate kamme, jātiyā vāpi ekato; Pacchime ekato jātā, khattiyā kulasambhavā.

Rūpavatī bhogavatī, lābhasakkārapūjitā; Antepure mahāvīra, devānaṁ viya nandane.

Nibbinditvā agāramhā, pabbajimhanagāriyaṁ; Katipāhaṁ upādāya, sabbā pattāmha nibbutiṁ.

Cīvaraṁ piṇḍapātañca, paccayaṁ sayanāsanaṁ; Upanenti bahū amhe, sadā sakkatapūjitā.

Kilesā jhāpitā amhaṁ, bhavā sabbe samūhatā; Nāgīva bandhanaṁ chetvā, viharāma anāsavā.

Svāgataṁ vata no āsi, mama buddhassa santike; Tisso vijjā anuppattā, kataṁ buddhassa sāsanaṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.

Yasavatīpamukhaaṭṭhārasabhikkhunīsahassāpadānaṁ paṭhamaṁ.