“Abhikkantena vaṇṇena, yā tvaṁ tiṭṭhasi devate; Obhāsentī disā sabbā, osadhī viya tārakā.
tārakā → tāramā (pts)

Kena tetādiso vaṇṇo, kena te idha mijjhati; Uppajjanti ca te bhogā, ye keci manaso piyā.

Pucchāmi taṁ devi mahānubhāve, manussabhūtā kimakāsi puññaṁ; Kenāsi evaṁ jalitānubhāvā, vaṇṇo ca te sabbadisā pabhāsatī”ti.

Sā devatā attamanā, moggallānena pucchitā; Pañhaṁ puṭṭhā viyākāsi, yassa kammassidaṁ phalaṁ.

“Ahaṁ manussesu manussabhūtā, purimāya jātiyā manussaloke.

Addasaṁ virajaṁ buddhaṁ, vippasannamanāvilaṁ; Āsajja dānaṁ adāsiṁ, akāmā tiladakkhiṇaṁ; Dakkhiṇeyyassa buddhassa, pasannā sehi pāṇibhi.
pāṇibhi → pāṇihi (bj, pts) | sehi pāṇibhi → sakehi pāṇihi (sya-all) | pāṇihi → B,N,VvA(R) adāsi dīpaṁ (pts note)

Tena metādiso vaṇṇo, tena me idha mijjhati; Uppajjanti ca me bhogā, ye keci manaso piyā.

Akkhāmi te bhikkhu mahānubhāva, manussabhūtā yamakāsi puññaṁ; Tenamhi evaṁ jalitānubhāvā, vaṇṇo ca me sabbadisā pabhāsatī”ti.

Tiladakkhiṇavimānaṁ dasamaṁ.
Tiladakkhiṇavimānaṁ → tiladakkhiṇāvimānaṁ (bj) | dasamaṁ → (pts) | Tiladakkhiṇavimānaṁ → R, dadati (pts note)