“Idaṁ vimānaṁ ruciraṁ pabhassaraṁ, veḷuriyathambhaṁ satataṁ sunimmitaṁ; Suvaṇṇarukkhehi samantamotthataṁ, ṭhānaṁ mamaṁ kammavipākasambhavaṁ.

Tatrūpapannā purimaccharā imā, sataṁ sahassāni sakena kammunā; Tuvaṁsi ajjhupagatā yasassinī, obhāsayaṁ tiṭṭhasi pubbadevatā.

Sasī adhiggayha yathā virocati, nakkhattarājāriva tārakāgaṇaṁ; Tatheva tvaṁ accharāsaṅgaṇaṁ imaṁ, daddallamānā yasasā virocasi.
accharāsaṅgaṇaṁ → accharāsaṅgamaṁ (bj)

Kuto nu āgamma anomadassane, upapannā tvaṁ bhavanaṁ mamaṁ idaṁ; Brahmaṁva devā tidasā sahindakā, sabbe na tappāmase dassanena tan”ti.

“Yametaṁ sakka anupucchase mamaṁ, ‘Kuto cutā tvaṁ idha āgatā’ti;
tvaṁ idha āgatā’ti → kuto cutā idha āgatā tuvaṁ (sya1ed, sya2ed) Bārāṇasī nāma puratthi kāsinaṁ, tattha ahosiṁ pure kesakārikā.

Buddhe ca dhamme ca pasannamānasā, saṅghe ca ekantagatā asaṁsayā; Akhaṇḍasikkhāpadā āgatapphalā, sambodhidhamme niyatā anāmayā”ti.

“Tantyābhinandāmase svāgatañca te, dhammena ca tvaṁ yasasā virocasi;
svāgatañca → sāgatañca (bj) Buddhe ca dhamme ca pasannamānase, saṅghe ca ekantagate asaṁsaye; Akhaṇḍasikkhāpade āgatapphale, sambodhidhamme niyate anāmaye”ti.

Kesakārīvimānaṁ sattarasamaṁ.
Kesakārīvimānaṁ → pesakāriyavimānaṁ (sya1ed, sya2ed)

Tassuddānaṁ

Pañca pīṭhā tayo nāvā, dīpatiladakkhiṇā dve; Pati dve suṇisā uttarā, sirimā kesakārikā; Vaggo tena pavuccatīti.

Itthivimāne paṭhamo vaggo.
paṭhamo vaggo → pīṭhavaggo paṭhamo (bj); itthīvimāne vaggo paṭhamo (sya1ed, sya2ed)