“Pīṭhaṁ te veḷuriyamayaṁ uḷāraṁ, manojavaṁ gacchati yenakāmaṁ; Alaṅkate malyadhare suvatthe, obhāsasi vijjurivabbhakūṭaṁ.
malyadhare → mālyadhare (bj, sya-all) | malyadhare → T mālya-; (S) malla- (pts note)

Kena tetādiso vaṇṇo, kena te idha mijjhati; Uppajjanti ca te bhogā, ye keci manaso piyā.

Pucchāmi taṁ devi mahānubhāve, manussabhūtā kimakāsi puññaṁ; Kenāsi evaṁ jalitānubhāvā, vaṇṇo ca te sabbadisā pabhāsatī”ti.

Sā devatā attamanā, moggallānena pucchitā; Pañhaṁ puṭṭhā viyākāsi, yassa kammassidaṁ phalaṁ.

“Ahaṁ manussesu manussabhūtā, abbhāgatānāsanakaṁ adāsiṁ;
āsanakaṁ → C1,VvA(C) -gatānaṁ āsanakam (pts note) Abhivādayiṁ añjalikaṁ akāsiṁ, yathānubhāvañca adāsi dānaṁ.

Tena metādiso vaṇṇo, tena me idha mijjhati; Uppajjanti ca me bhogā, ye keci manaso piyā.

Akkhāmi te bhikkhu mahānubhāva, manussabhūtā yamakāsi puññaṁ; Tenamhi evaṁ jalitānubhāvā, vaṇṇo ca me sabbadisā pabhāsatī”ti.

Dutiyapīṭhavimānaṁ dutiyaṁ.
dutiyaṁ → (bj, pts) | Dutiyapīṭhavimānaṁ → B,N add dutiyaṁ; R,T Pīṭhavimānaṁ dutiyaṁ (pts note)