“Anekavaṇṇaṁ darasokanāsanaṁ, vimānamāruyha anekacittaṁ; Parivārito accharāsaṅgaṇena, sunimmito bhūtapatīva modasi.

Samassamo natthi kuto panuttaro, yasena puññena ca iddhiyā ca;
panuttaro → uttari (mr) Sabbe ca devā tidasagaṇā samecca, taṁ taṁ namassanti sasiṁva devā; Imā ca te accharāyo samantato, naccanti gāyanti pamodayanti.

Deviddhipattosi mahānubhāvo, manussabhūto kimakāsi puññaṁ; Kenāsi evaṁ jalitānubhāvo, vaṇṇo ca te sabbadisā pabhāsatī”ti.

So devaputto attamano, …pe… yassa kammassidaṁ phalaṁ.

“Ahaṁ bhadante ahuvāsi pubbe, sumedhanāmassa jinassa sāvako; Puthujjano ananubodhohamasmi, so satta vassāni paribbajissahaṁ.
ananubodhohamasmi → anavabodhohamasmiṁ (bj, pts-vp-pli2); anubodhohamasmi (sya1ed, sya2ed, pts-vp-pli1); ananubodhohamāsiṁ (?) paribbajissahaṁ → pabbajissahaṁ (sya1ed, sya2ed, mr); pabbajisāhaṁ (pts-vp-pli1)

Sohaṁ sumedhassa jinassa satthuno, parinibbutassoghatiṇṇassa tādino; Ratanuccayaṁ hemajālena channaṁ, vanditvā thūpasmiṁ manaṁ pasādayiṁ.

Na māsi dānaṁ na ca matthi dātuṁ, pare ca kho tattha samādapesiṁ; Pūjetha naṁ pūjanīyassa dhātuṁ, evaṁ kira saggamito gamissatha.
pūjanīyassa → pūjaneyyassa (sya1ed, sya2ed, mr); pūjaniyassa (mi5.3.7:1 [Buddhapūjanapañha])

Tadeva kammaṁ kusalaṁ kataṁ mayā, sukhañca dibbaṁ anubhomi attanā; Modāmahaṁ tidasagaṇassa majjhe, na tassa puññassa khayampi ajjhagan”ti.

Anekavaṇṇavimānaṁ aṭṭhamaṁ.